Pakusgan sa Lalawigan sa Davao del Norte ang kapabilidad ug kapaspas niini sa pag-diagnose ug pagresponde sa mga kaso sa COVID-19 pinaagi sa pagtukod sa unang diagnostic laboratory sa Mindanao.

Naghiusa ang pwersa sa Probinsyal nga Kagamhanan sa Davao del Norte, kuyog sa mga kagamhanan sa Tagum City, Panabo City, ug Island Garden City of Samal, ug kauban ang Davao Regional Medical Center (DRMC), ug ang University of the Philippines (UP) – Mindanao aron tukuron ang maong COVID-19 testing center.

Gipangunahan ni Kuya Gov. Edwin I. Jubahib ang paglagda sa Memorandum of Agreement (MOA) sa pagpatindog sa pasilidad, kauban sila Tagum City Mayor Allan Rellon, DRMC Director Dr. Bryan Dalid, UP-Mindanao Chancellor Dr. Larry Digal, ug Diego Luis Suelto, ang CEO sa Maer Summit Konstrukt Company (MSKC).

Ang P12-million nga pondo alang sa proyekto gi-amotan sa probinsya ug sa maong mga dakbayan. Ibutang ang testing center sulod sa DRMC sa Tagum City ug gitarget kini nga mahuman karong umaabot nga bulan sa Hunyo.

Sulti ni Kuya Gov nga ang testing center dakong tabang aron madugangan ang kapasidad sa Davao Region ug kasikbit niini nga mga rehiyon. Kay sa kasamtangan ang pag-testing ginapahigayon lang sa Southern Philippines Medical Center (SPMC) sa Davao City, gumikan kay kini pa lang ang subnational referral center sa Covid-19 sa tibuok Mindanao.

Gamiton sa pasilidad ang ‘real-time polymerase chain reaction (PCR) detection system’, diin gi-disenyo alang sa mga infectious materials, subay sa World Health Organization ug Department of Health.

Ang MSKC ang motukod sa laboratoryo, samtang kini sab ang mo-donar sa RT￾PCR Machine nga gamiton sa pasilidad.

Sulti ni Dr. Lyre Anni Murao, Professor of Virology sa UP-Mindanao ug Director sa Philippine Genome Center (PGC) Mindanao nga magamit ang pasilidad dili lang sa COVID-19, apan gitagana sab kini alang sa research sa uban pang “emerging infectious diseases” kon sa mga motumaw nga bag-ong klase sa makatakod nga sakit. (Nobags)

 

 

 

#OneDavNorBatokCOVID-19
#BeatCOVID19
#WeHealAsOne