WALAY PILI. Bisan ang mga Muslim mosques gipahatdan ni Kuya Gov. Edwin I. Jubahib og mga food packs aron matabangan pagsagubang sa krisis dala sa COVID-19 pandemic.

Unang gihatdan ug tig-isa ka sakong bugas, duha ka sakong harina, napulo ka kilong asukal ug mga kape ang 24 ka mosques sa syudad sa Panabo City karong adlawa sa Byernes, Mayo 8. Samtang ang laing 18 ka mga mosques sa Carmen, Dujali ug Sto. Tomas hatdan ugma sa parehas nga hinabang.

Dako kaayo ang pasalamat sa mga Muslim lideres ilabinang gisaulog sab nila ang Ramadan.

“Ako lang ipaabot kang Gob ang pagpasalamat namo sa among Purok kay karong panahona hasta gyod kapait. Kay ang kahumok sa iyang kasingkasing miabot gyod ang hinabang, daghan kaayong salamat Governor Jubahib,” matod ni Allan Saronay Malawani, sa Purok Islam, Gredu, Panabo City.

Tungod sa COVID 19, gipahigayon ang mga lockdowns ug wala malikayi ni Malawani ang pagkumparar sa miaging tuig nga Ramadan.

“Sa sistema karon sa lockdown ug sa Ramadan pwerteng lisora jud. Sa labing tinuod layo kaayo sa unang Ramadan niadtong miaging tuig ug pagka-karon kay perting lisora gyod kay ang atong government nakasinati pod ug kasakit sa atong mga kaigsoonan. Daghang kaayong salamat,” padayong pasalamat sa Muslim lider.

Gipangunahan ni IPMR Representative ex-officio Board Member Ariel Macla, kauban ang Executive Assistant ni Kuya Gov nga si Norlyn Oring, ang paghatod sa mga food packs ngadto sa tanang Muslim mosques sa Panabo City.

Bisan kung “ginagmay” lang ang hinabang apang alang sa mga Muslim dako na kaayo ni nga tabang.

“Dako kaayo akong pasalamat kaning inyohang gihatod dire kay bisag ginagmay lang nga tabang pero kapuslan sa tawo. Gikan sa iyaha (Gob), daghan kaayong salamat aning tanan Sana magpadayon ang iyang pagserbisyo sa tanan,” matod ni Mr Adel, sa Barangay Datu Abdul.

“Oy dakong pasalamat nako ana kay Gob. Hasta ning akong mga sakop nga katawhan dako kaayong tabang ni. Bisag gamay ra dako na kaayo na’g ikatabang sa katawhan.

Kabalo ko nga si Gob di gyod na mobiya sa katawhan, motabang gyod na. Syempre, dakong pasalamat, dinagkong pasalamat uban sa among katawhan dire. Salamat kaayo,” matod sa laing Muslim lider nga si Ricardo Macla.

Niadtong Mayo 4, gihatdan sab ni Kuya Gob ang mga parokya sa Distrito 2 ug tig-duha ka sakong bugas aron sab sila matabangan pag-atubang sa krisis.

Gawas sa lain-lain relihiyosong denominasyon, kaduha na maghatod si Gobernador Jubahib ug mga food packs sa mga barangays sa Davao del Norte gawas lamang sa mga Tagum City barangays nga pagahimoon ang paghatod karong adlaw’ng Martes, Mayo12.

(Makita sa mga larawan nga gipangunahan ni IPMR Representative ex-officio Board Member Ariel Macla ang paghatod sa mga food packs ngadto sa tanang Muslim mosques sa Panabo City kauban ang mga personahe sa , PSWDO, PGO ug ubang departamento sa DavNor Kapitolyo. Kay kulang ug kargador, ang mga service-drayber nahimong kargador)

#OneDavNorBatokCOVID-19
#BeatCOVID19
#WeHealAsOne