Bisan pa man nga adunay hulga sa COVID-19, wala gayud matay-og ang One DavNor Council of Women sa pag-implementar ug project pilot-testing sa pinakauna nga proyekyo niini karong tuiga ubos sa ilang Livelihood Program.

Ang One DavNor Council of Women ubos sa liderato ni Atty. Anna Alvarez, personal nga nitunol ug 1,000 kilos nga mga isdang Mackerel kang Mrs. Yhora Mae Rellon, Presidente sa Tagumpay Council of Women, aron iapod-apod unya sa 10 ka women's associations sa Syudad sa Tagum.

Ang tumong sa maong Livelihood Program subay sa panglantaw ni Kuya Gov. Edwin I. Jubahib nga mahatagan ug dugang panginabuhian ang mga women's associations ilabi na karon nga anaa sa taliwala sa dakong krisis sa sakit nga COVID-19 ang probinsya. Dugang niini, basehan ang maong pilot-testing kung andam na ba nga maimplementar ang proyekto sa konseho sa tanang women's councils sa mga lokal nga panggamhanan sa Davao del Norte.

Ang mga isdang Mackerel gisuplay sa Marina Tuna, usa sa mga aktibo nga partner sa One DavNor Council of Women. Ang kita sa maong proyekto mapadulong tanan sa mga women's associations kay tinguha man sa konseho nga mapalambo ang kinabuhi dili lamang sa mga kababaihan apan apil na ang mga pamilya niini.