ARON MAPATUD-AN ang epekto sa Sorghum (scientific name Sorghum bicolor) kontra “Fusarium Wilt” gawas pa sa income niini, gisugdan pagpugas ang usa ka ektaryang luna sulod sa Asuncion Production Center sa barangay Magatos, Marso 5.

Ang sorghum nga nga naggikan sa Africa gitawag sab ug “great millet, durra, jowari, o milo” maoy usa ka klase sa sagbot nga ang bunga gigamit alang sa pagkaon sa tawo ug mananap ingon man produksyon sa ethanol.

Katuyoan sa administrasyon ni Gobernador Kuya Gov. Edwin I. Jubahib nga matabangan ang mga mag-uuma sa sagingan nga apektado sa sakit nga Fusarium Wilt o Panama Disease.

“Nakita nako nga dako kaayo ni’g matabang sa na-down nga banana industry.. Mentras wala pa, aduna ta’y alternative, sorghum and corn. . Kung nakita nato nga maayo ang production sa sorghum ug makatabang sa mga farmers, why not nga dili ta magtanom labi na sa atong mga ancestral domain areas. Thousands of ancestral domain lands nga naka-tiwangwang lang, wa gyo’y produkto,” matod ni Kuya Gob ilabina ngadto sa mga mag-uuma sa saging.

Ang binhi sa sorghum donasyon sa Scott Seeds, Houston, Texas, USA, gihatag nga libre lakip na ang gastos sa shipping ngadto sa Davao del Norte pinaagi ni Mindanao Development Authority (MinDA) Secretary Emmanuel Piñol.

“What we would like to achieve in this sorghum program? Number one, there is this anecdotal testimony nga kung tamnan daw ni’g mais o sorghum ang fusarium affected areas, ma-neutralized daw ang fusarium, and that is precisely one of the reason to produce sorghum in one of the affected areas kay basin matinuod. Number two, sorghum can offer you an alternative crop in the meantime nga wala ta’y mahimo sa atong sagingan,” matod ni MinDA Secretary Manny Piñol.

Nga usa ka mag-uuma, mas pabor ang MinDA chief sa sorghum kay sa mais.

“Why I am recommending sorghum? Because unlike mais, nga ang iyang bunga mas taas ug protein content, therefore maayo sa feeds. . Number two, ang sorghum barato, could allow drought, because sorghum is basically a grass, an African grass. Unya ang mais usa ka tanom, usa lang pod ka harvest. Ang sorghum ratoons. Usa nimo ka tanom pwede ka mag-harvest three times kung maayo ang farm management. Mas barato ang iyang binhi,” pagtandi ni Piñol nga nagtug-an sab nga sa Australia, ang sorghum maoy usa sa gigamit alang sa cattle fattening program.

Ang sorghum moani ug aberids upat ka tonelada ang ektarya ug moabot pa ug walo ka tonelada depende sa pag-atiman sa umahan.

Gawas sa libreng binhi sa sorghum, duna pa gyod libreng mineral nga abono nga gihatag ang MinDA chief ug gusto niya nga ipaapil sa pagtuon sa mga DavNor agrikulturista diha sa upat ka lain-laing kahimtang (4 plots).

Apan pinaka-importante nga ang produkto adunay seguradong mopalit.

“Duna ta’y buyer. Dili ko mag-introduce sa inyo ug produkto nga walay buyer kay diha napalpak ang atong agriculture. Ang buyer nato duha ka kompaniya. The moment we start planting, full planting nato by June, we will sign a marketing agreement with Pilmico at P12 per kilo,” pagseguro ni Piñol.

Gidasig sab sa MinDA chief si Kuya Gob sa “Plow Now Pay Later” nga sistema aron matabangan pag-ayo ang mga mag-uuma nga giuyonan sa DavNor gobernador.