GIPAHILUNA NA ang timaan sa pagsugod sa konstruksyon alang sa 150 milyones pesos nga DavNor Sangguniang Panlalawigan bilding sulod sa Provincial Capitol compound, Myerkoles, Pebrero 19.

Gitakda nga moabot ug 376 ka adlaw aron mahuman ang maong bilding.

“Ang gi-budget ana is 150 million, two floors and then naa ta’y 14 Sangguniang Panlalawigan offices, para sa mga Board Members. Of course, office of the vice governor, session hall, archives, office of the Sanggunian Secretary, visitor lounge and mess hall,” matod ni Bise Gobernador Rey T. Uy sa wala pa magsugod ang groundbreaking.

Gibutyag sab sa bise gobernador nga dili gyod masayang ang daang SP bilding nga hapit na mag-kwarenta anyos ang edad bisan tinuod magamit pa tungod sab sa ubang opisina nga nagkinahanglan ug dakong lugar-trabahoanan.

“Way problema nang ma-vacate nga building kay daghan na ang nagpa-reserve. Ang Accounting Office kay gamay na daw ilang opisina; then I heard nga ang Prosecutors’ Office, so daghan naghulat kung mabakante na. So it’s worth nga magtukod ta’g bag-o kay wala gyoy masayang nga old building,” dugang ni Uy.

Ang bag-ong SP bilding magpadali sab sa paspas na nga Sangguniang Panlalawigan kung bahin sa pagpasar ug mga resolusyon ug ordinansa para sa kalamboan ingong suporta sa administrasyon ni Gobernador (Kuya Gob) Edwin I. Jubahib.

“Paspas gyod mi. Basta everything in order we will act immediately. Dili mi gusto mag-dilly-dally. Kay ang posisyon ni Kuya Gob, chief executive miagi pod ko ana. Gusto pod nako pinaspasay, kay what is three years ang one term, so paspas gyod ta. Pag naay urgent diha importante, pwede mi mag-special session anytime of the day and night. A text away ra ang atong mga board members. Basta what is good for the public, suporta gyod ta, walay daghang estorya ana,” pasalig ni bise gobernador Uy.

Sa paglingkod ingong bise-gobernador, gipatuman ni Uy ang pagdaginot bisan diha sa mga bond paper nga balehon (invert) alang sa pag-recycle.