NANAWAGAN ang departamento sa Agrikultura kauban ang Provincial Veterinary Office (PVO) nga magpakabana ug magtinabangay gayod ang katawhan aron dili makasulod ang African Swine Fever (ASF) dinhi sa Davao del Norte.

Sa Kapihan sa DavNor kagahapon, gipalanog ni National President of the Association of Municipal/City Agriculturists of the Philippines Alejandro Mayato unang-una ngadto sa iyang mga kaubanan sa trabaho.

“Ang atong panawagan una, sa akong mga kauban sa serbisyo sa gobyerno labina sa sektor sa agrikultura: Ato ning mandate unsaon nga mapadala ang impormasyon sa atong mga hog raisers ug sa atong mga katawhan labina sa kabarangayan. Dili ta pwede nga maghulat nga sila’y mag-adto sa ato. Kita gyod dapat ang mangita’g paagi unsaon maabot nato sila, kita mismo ang mohimo’g paagi nga makaabot sa ila ang information. . Pagka-karon nga ang Davao del Norte free pa sa ASF, tabangan gyod nato ni. . “Ato gyo’ng paningkamotan nga dili makasulod, kay kung makasulod ni siya dako ang domino effect,” matod ni Mayato nga mao sab ang City Agriculturist sa Panabo City.

Matod ni DavNor Veterinarian Dr. Rommel Montiel nga segun sa talaan nga anaa sa ilang opisina, ang Davao del Norte adunay kapin kun kulang 129,000 ka mga baboy nga naglangkit ug bilyon nga industriya.

Iyang giawhag nga himoon ang upat ka butang alang sa kahilwasan sa industriya.

“Sa tanang nagbuhi ug baboy: Ato sa gyo’ng likayan ug dili sa gyod ta magpakaon ug mga lamaw diha sa atong mga baboy. Ikaduha, kung adunay abnormal o unusual nga pagkamatay sa mga baboy ato’ng i-report dayon sa CAGRO, MAGRO, City Vet Office aron masuta kung unsa gyo’ng hinungdan sa maong sakit. Ikatulo, sa mga boundaries nato nga wala pa’y mga checkpoint nga gi-set-up ang atong gobyerno, magbantay ta sa mga baboy nga mosulod sa atong area. Kung mahimo i-report kini or dili nato pasudlon. Lastly, among ginahangyo kanang mga nagabaligya, nagapalit ug mga baboy nga dili sila mobaligya niadtong dunay mga sakit,” matod ni Dr. Montiel.

Kahinumduman nga dinhi sa Mindanao, nagsugod ang ASF didto sa lungsod sa Don Marcelino, Davao Occidental ug miabot na sa silingang Davao del Sur hinungdan nga nagpagawas ug Executive Order No. 28 si Gobernador (Kuya Gob) Edwin I. Jubahib sa pag-ban sa tanang baboy ug mga by-products nga makasulod sa Davao del Norte.

Gawas sa ban, daan nang nagpahimutang ug mga quarantine checkpoints si Kuya Gob sa tanang entry ug exit points sa probinsya niadto pang miaging tuig sa tuyo nga dili madaot ang dako’g puhunan nga industriya.