“ONE DAVNOR, ONE TEAM” ang probinsyal nga panggamhanan ni Gobernador (Kuya Gob) Edwin I Jubahib ug LGU Asuncion aron palambooon ang turismo sa maong lungsod.

Human sa pagbisita sa mga tourism sites sa New Corella niadtong Enero 29, ang mga tourism potentials sa Asuncion na sab ang gibisita sa “full-force” nga mga departamento sa Kapitolyo, Pebrero 5.  

Si Asuncion Vice Mayor Joel Camello ang mihatag ug pasalig alang sa LGU.

“One Team na ta karon. . ang atoang munisipyo nga mahimong kabahin sa kalamboan sa Davao del Norte. Gipakusgan ani ang turismo kay maoy usa sa nakita nato nga maka-engganyo ug local ug foreign tourists. Ang lungsod sa Asuncion adunay tulo nga gi-identify nga tourist spots. Ang uban ani partially developed. Ang una ani kanang Madgao, nakatutok ta dinha. Ang ikaduha, kadtong sa Binancian nga ‘Road to Forever’ overlooking province of Davao del Norte, ug, kining Eco-Tourism park sa New Bantayan. Kami mapasalamaton kaayo sa atong gobernador. Sa pakig-alayon, 100% nga suporta gikan sa liderato ni Mayor Eufracio Dayaday, Jr. gisuportahan sa Sangguniang Bayan,” matod ni Vice Mayor Camello nga nagbutyag sa ilang mga bag-ong heavy equipments nga makatabang sa mga ekipo sa probinsya alang sa imprastruktura.

Ang DavNor tem gipangunahan mismo ni Kuya Gob.

“Full-force ang provincial government para mahataga’g support pag-develop sa inyohang eco-tourism dinhi sa Asuncion. Every municipality makapili ta ug tulo ka sites ingon nga maoy initial nga i-develop. Target nato this year nga before mag-August mahuman na ang pag-develop then maka-start na sa month of September. Naa na ta’y budget. Nag-loan ta ug worth 200 million pesos for all Davao del Norte tourism developments. . . Mag-adto ta sa area for sites visitation and inspection para makita nato dayon kuyog ang atong engineering ug architect para automatic nahibalo ta on-site unsa ang atong nakita, unsaon pod nato pag-develop,” pasabot ni Kuya Gob nga gikuyogan sa mga 19 ka mga department heads ug ilahang representante.

Dugang gipasabot ni Gobernador Jubahib nga gamay o kaha wala’y makab-ot nga kalamboan kung mag-iyahay ang probinsya ug LGUs.

“Ang tourism maoy usa ka potential nga dapat himoon sa usa ka lugar para mailhan ta. So mao ni ang atong himoon nga teamwork, template nato sa Davao del Norte. Sa Mindanao, walay probinsya nga nag-create ug tourism projects nga gi-tour ang tibuok probinsya. Mao nang nagkauyon ta nga i-develop ang atong mga potential sites para tourist destinations ‘from Island to Highland;’ ana ang atong package, ang ending nato paingon sa Samal Island. Happy all tanan kay gi-involved nato ang eleven LGUs sa atoang tourism developments,” dugang pasabot ni Kuya Gob nga ang panagkuyog ubos sa ‘One DavNor, One Team’ seguradong ma-suportahan ang onse ka LGUs sa pag-develop sa ilahang mga tourist destinations nga mopahinabo ug dugang trabaho ug kita.

Sa pagkakaron gisugdan na ang paghan-ay ang mga plano alang sa maong tourism sites.