GIPAHUGTAN pa sa probinsyal nga panggamhanan ni Gobernador (Kuya Gob) Edwin I. Jubahib ang pagbantay aron gayod dili makasulod ang African Swine Fever (ASF) nga karon nag-apektar sa probinsya sa Davao Occidental ug Davao del Sur.

Bisan kung na-establisar na ang mga quarantine checkpoints diha sa tanang entry ug exit points sa Davao del Norte, hugot nga ipatuman ang dili pagsulod ilabina kung dili certified ang gigikanan.

“Naka-establish na ta ug mga quarantine checkpoints sa mga entry points dinhi sa probinsya sa Davao del Norte. . Base sa inspection team nga atong gibutang sa mga entry points, pagtan-aw nila nga dili certified, dili na makasulod dinhi sa atong probinsya,” matod ni Kuya Gob atol sa interbyu human sa joint RPOC XI ug RDC XI miting, Lunes, Pebrero 3.

Sa taho ni Department of Agriculture Regional Director XI Ricardo Oñate atol sa maong joint miting, kapin kun kulang 2,000 na ka mga baboy ang nangamatay gikan niadtong Enero 28 sa walo ka barangays nga sakop sa Don Marcelino, Davao Occidental ug gikataho sab nga mikuyanap na kini sa ubang dapit lakip sa Davao del Sur. 

Ilabinang dili makasulod ang karne ug buhing baboy ug bisan manok gikan sa nahisgotang apektadong mga lugar.  

“Ang mga karne, buhing baboy lang ug mga manok maoy atong gi-ban, so far karon, aron mahimong safety gyod ang atong Davao del Norte kadtong gikan sa affected Occidental ug del Sur,” pagklaro ni Gobernador Jubahib labot sa maong mga produkto nga wala pa maglakip sa mga de-lata.

Hangtod ning pagsulat wala pa natino sa DA XI diin naggikan ang ASF apan dako ang katahap sa maong ahensya nga miabot kini sa Don Marcelino pinaagi sa dagat sanglit ang atbang nga Indonesia, nga apektado sa ASF, ngadto-nganhi ang magbiyahe nga maabot lang ug pipila ka oras.