GISUGDAN na ang konsultasyon tali sa probinsyal nga panggamhanan ug sa Onse ka mga Local Government Units aron magkauyon ang mga plano ug proyekto pang-kalamboan ug paspas nga mahatod ang mga serbisyo-sosyal ngadto sa katawhan.

Unang gihimo ang konsultasyon sa DavNor nga gipangunahan ni Gobernador (Kuya Gob) Edwin I. Jubahib kauban ang mga department heads ug sa munisipyo sa New Corella nga gipangunahan ni Mayor Jorjan “Monet” Federiso kauban sab ang iyang mga department heads, Enero 29.  

“Ang provincial government mao na’y minaug sa municipal level. Tuyo nato ni kay gusto nako nga magkauyon ang atong mga plano para sa development. Kay kung magkanya-kanya ta, katag kaayo, unya isa ra ka tao ang atoang giserbisyohan. Ang naa sa barangay, mao ra’y atong ginatan-aw nga interest. Busa para mas paspas ug mas compact ang services nga atong mahatod, mao ning minaug mi para mangutana mi sa inyoha unsa’y mga plans and programs for this year and coming years, unsa’y atong vision sa development. Kami pod sa province naa mi target nga i-present para himoon natong joint labina kaning sa atoang social services ug social development,” pasabot ni Kuya Gob sa tanan nga naghisgot gikan sa land classification, serbisyo panglawas ug uban pa.

Gawas sa paghatod sa mga social services, tumong sa DavNor nga pakusgon pa ang turismo ug pagpalambo pinaagi sa pag-explore sa mga kuweba ug sa mga existing tourism sites sa New Corella lakip ang Panas Waterfalls aron makahatag ug trabaho ingon man kinitaan sa LGU.

“Labi na karon sa present, kamo man ang nahibalo kung unsa ang pinaka-nindot nga tourist destination nga pwede natong i-develop.  Mas maayo ning sabotan nato,” dugang pasabot ni Kuya Gob diin gipresentar sa New Corella Tourism Officer ang 2017-2022 nga plano-pangkalambuan alang sa turismo sa lungsod.

Ilabinang gitutokan ang paghatod serbisyo-panglawas pinaagi sa Universal Health Care (UHC).

“Kining mga problema nato kinahanglan ato ning sabotan tanan labina gyod kaning sa health. Naa ta’y Universal Health Care pero kamo kung dili mo mu-participate, problema kaayo na. Kay unsaon pag-apil sa libre nga tambal, libre nga hospitalization. Mao na ang purpose nga nakig-dialogue sa inyoha, i-share ninyo ang inyong gusto, i-share namo ang among gusto ug kinahanglan magkasabot ta; bakas ta sa development, starting this year and mo-project ta up to twenty years from now,” dugang pasabot sa gobernador ng masa diin gi-detalye ni Provincial Health Officer Dr. Alfredo Lacerona ang “pagtinabangay” alang sa bug-os nga implementasyon sa UHC.  

Pinaagi ni Mayor “Monet” Federiso andam nga mopaluyo ang New Corella sa UHC lakip na ang pagpagaan sa trabaho sa mga DavNor District Hospitals pinaagi sa paghimo sa kaya ra’ng himoong Barangay Health Services (BHS) sama sa check-up, pre-natal, pagpanganak ug uban pa.

Human sa New Corella, naka-linya na ang mga LGUs alang sa parehas nga konsultasyon alang sa kalamboan.