TUNGOD sa reklamo sa mga suppliers ug bisan sa sulod sa taga DavNor Kapitolyo, gi-miting ni Gobernador (Kuya Gob) Edwin I. Jubahib ang tanang Liaison Officers ug mga tig-follow-up sa mga dokumento alang sa paspas nga trabaho, hapon sa Enero 13.

Usab aron malikayan magtipun-og ang mga dokumento ug masayran ang mga kulang nga hinungdan sa kalangan.

“Kutob sa mahuman nga documents i-run dayon. . Sayang ang oras nga milabay nga way trabaho. Tanan nga opisina i-rquired nako, nga tanan nga mahuman nga documents idagan dayon, bisag isa ra na,” matod ni Kuya Gob nga medyo mitaas ang tingog tungod sa daghang reklamo nga miabot sa iyang opisina labot sa kalangan sa pag-proseso sa mga dokumento.  

Gisugyot sa gobernador nga angayan dunay bukas nga komunikasyon aron mapadali ang pag-follow-up nga di na kinahanglan adtoon pa. Iya sab gi-pananglitan ang iyang opisina nga walay papeles nga gilangan-langan nga bisan ug adlaw’ng Domingo, iya gyod gianhaan sa opisina aron mapirmahan.

“Dapat mangutana ug contact number. . Tan-awa ‘tong pirmahanan sa akong opisina, way bisan usang papel. Ganihang buntag usa ko nigawas gipirmahan na nako daan. Gahapon ang nagtapun-og nga pirmahanan, gipirmahan nakong tanan, dire ko sa Tagum. Kay di ko gusto moingon mo nga nag-require ko sa inyoha nga paspas ang pag-run sa documents unya tua tanan nagtapok sa akoa,” pagklaro ni Kuya Gob.

Ilabinang gipasiugda ni Kuya Gob nga angayan ang taga-gobyerno magtarong sa panarbaho sanglit gihimong “sumsuman” sa publiko labot sa dili tarong nga mga trabaho.

“Bag-ohon natong batasan ug “kanang gipangalan sa atoa nga kanang mga trabahante sa gobyerno mga tapolan.” Maot kaayo ang imahen sa gobyerno, permanenteng himoong sumsuman sa mga salawayon nga trabaho. Dapat kita ang model. Dili ang private firm. Dapat kitang taga gobyerno ipakita nato nga ang quality of time nga nagtrabaho ta, ang atoang effort unsa ta ka-sincere sa atong trabaho,” padayong maymay ni Kuya Gob kinsa nagpa-ambit sa iyang kasinatian gikan sa pagka-pobre hangtod nakaabot sa maayong kahimtang sa kinabuhi nga ang puhunan mao ang pagka-kugihan ug pagka-kasaligan.

“Di nako gusto karon nga ang hinungdan nga malangan sa pag-process sa atong documents dire tungod sa inyoha. . Wa ko’y labot sa inyohang personal basta sabot nato 8 hours nga trabaho, ayohon nimo. . Sugod karon naa ta’y bag-ong rules. Kung unsa nga mga documents, paggawas sa inyohang opisina kinahanglan kumpleto na tanan, wa na’y mali tanan. Kung naay corrections asikasoha dayon na. . .  Ato gyong gigastohan ug oras karon para mag-usab ta. Manghinaut ko nga human karon, manguli mo sa inyong tagsa-tagsa ka opisina inyong masabtan kung unsa’y gusto nako,” pagklaro sa gobernador ng masa.

Gawas sa mga pag-maymay, gipasalig ni Kuya Gob sa mga Liaison Officers nga pwede siyang duolon sa tanang higayon.

“Padayon ta magtrabaho. Kung duna mo’y dili nagustohan, ayaw panglibak, i-approach ko, estoryaha ko. Ako ra’y governor nga maduol ninyo anytime bisan asa sa Capitol or sa gawas. Pwede mo moestorya; modawat ko, consultative ko nga tawo, maminaw ko.. Maka-approach mo bisan diria sulod sa Capitol. Mas malipay pa ko ug makig-estorya mo sa akoa. . Makaduol mo sa akoa, makapangutana mo,” pasalig ni Kuya Gob.

Gilauman nga mohapsay na ang pagpadagan sa mga dokumento tungod sab sa dugang gihan-ay nga mga proseso sa PHRMO.