PREMYONG CASH, plake ang pasidungog nga nadawat sa mga publikong elementarya ug sekondarya nga eskwelahan sa Davao del Norte ingong maayong tigpatuman sa Gulayan sa Paaralan Program (GPP) kagahapon, Martes, Oktubre 1.

Gi-gradohan sa lima ka kategoriya sa educational relevance, community involvement, GAD equality, sustainability of garden ug impact on nutritional status nga modawat ug tig P25K ang first placer samtang tig P15K, P10K ug P5K alang sa 2nd, 3rd ug consolation prize sa matag elementarya ug high school nga lebel.

Sa ikaupat nga higayon, ang New Bantayan Elementary School sa lungsod sa Asuncion ang giilang hawod diha sa Field category samtang ang Semong National High School sa Kapalong ang mihawod sa sekondarya nga ang-ang nga pulos mag-representar diha sa search sa rehiyonal nga lebel.

Alang sa Container Category, ang Marcos Estoque Elementary School sa Kapalong ang nahimong mananaug samtang ang Tagum City National Comprehensive High School sab ang high school nga kategoriya nga sa gihapon apil sa regional search.

“This Gulayan sa Paaralan program is assisted by the National Greening Program and the Department of Agriculture for the high-value crop development alongside with the provision of seeds with garden tools. This showcase small-scale food production models kining atong field ug container gardening which can be easily replicated in households in the community. We are tying this up to the barangay para makita pod sa mga communities kung unsaon siya to give learnings,” matod ni OIC DavNor Provincial Agriculturist Daryll Ayado nga nagpasabot sa mga kaayohan nga makuha ilabina sa mga nag-eskwelang kabataan.

Ang GPP nagsilbi sab nga dakong tabang alang sa nagpadayong feeding program sa mga eskwelahan, magsilbing “laboratoryo” alang sa mga estudyante unsaon pagpatubo sa mga gulayon ug mag-aghat kanila nga mokaon ug gulay tungod sa daghang benepisyo nga makuha.

Aron gyod mapadayon ang programa, giseguro sa Department of Education nga mahatagan ug pasidungog ang mga maayong tigpatuman nga eskwelahan kauban ang probinsyal nga panggamhanan ni Gobernador Edwin I. Jubahib (Kuya Gob) nga migahin ug halos P303K pinaagi sa DavNor PAGRO nga maoy naghatag sa premyong cash.

Miabot ug Usa ka gatos ug napulo ka publikong elementarya ug sekondarya nga eskwelahan ang miapil sa Best Gulayan sa Paaralan sa tibuok probinsya.

Gitambongan gyod ni Committee Chairman on Agriculture Board Member Prospero (Popo) Estabillo, Jr. ug Committee on Media Affairs Rod Laguna nga maoy nag-representar kang Kuya Gob ang pagpasidungog sa mga midaug nga eskwelahan.