PADAYON nga gipahigayon sa probinsyal nga panggamhanan sa Davao del Norte ug Department of Interior Local Government (DILG) ang paghatag ug kasayoran (orientation) ngadto sa mga barangays nga nahimutangan sa mga proyekto sa Conditional Matching Grant to the Provinces (CMGP) sa tuyo nga kini magpakabana sa mga proyekto sa gobyerno.

“Ang purpose ani nakita man gud nila nga ang atong mga provincial roads dako pa kaayo ang wala na-kongkreto. Daghan pa pod ang dalan nga lubak-lubak, mga daot. Unsa may epekto ani sa atoa kung daot ang dalan? Dugay moabot, lisod kaayo magpagawas ug produkto, dako kaayong perwisyo sa atong kinabuhi,” matod ni Engr. Mary Grace Socapen gikan sa DILG XI.

Ang CMGP proyekto nga “Road Upgrading Km 9 Sagayen-Sawata Provincial Road” maoy usa ka “grant” (hatag) ngadto sa mga probinsya pinaagi sa DILG nga may kantidad halos 140 milyones ka pesos nga may gitas-on 10.26 kilometros. Ang pag-kongkreto may gilapdon nga 6.10 metros way labot ang tagsa ka metros nga “shoulder” matag kilid. Kini nagtadlas sa mga Asuncion barangays Sagayen, Pamacaun, New Loon ug barangay San Miguel sa lungsod sa San Isidro. Gitakda nga mahuman karong Nobyembre 30, 2019.

Apan bisan pa man kung kini hatag lang (grant), gikinahanglan sab nga makab-ot o makapasar ang usa ka probinsya sa mga sukdanan nga gilatid sa nasyonal nga panggamhanan sama sa Local Road Information Management, Local Road Network Development Planning, Local Road Construction and Maintenance, Local Road Asset Management, Internal Audit, Budgeting, Revenue Generation and Expenditure Management ug Procurement.

“Sa atoang pag-implementar sa proyekto sa gobyerno, kasagaran mag-monitor ana ang probinsya, ang PEO. Naa pa jud ang DILG, ang UNDP, NEDA. Pero bisan pa ana, kinahanglanon namo ang inyong pagtabang sa pagmonitor sa atong mga project. Di kailangan nga anaa mo didto 24-hours nga magbantay pero kung naa mo’y napansin ipaabot lang pod. Mao na gi-promote namo ang citizens’ participation,” padayong pasabot ni Engr Socapen aron nga mahatagan na sab ug laing proyekto ang probinsya para sa laing barangays.

Gawas sa DILG, gipasabot sa DavNor Provincial Engineering Office (PEO) kun sa unsang paagi gi-implementar ang CMGP proyekto kauban ang PPDO nga naghisgot sa “Planning and Identification of Road Sections nga pondohanan sa DILG-CMGP ug ang topiko sa pag-monitor ug hustong pagtuki (Monitoring and Evaluation). Gipasabot sab sa PENRO ang kahinugdanon sa Environmental Management Plan samtang gidumala sa mga personahe sa Provincial Human Resource Management Office (PHRMO) ang programa ilabina ang Open Forum nga pulos nag-awhag sa pagpakabana o “mag-apil-apil”.

Dili lang ang “Road Upgrading Km 9 Sagayen-Sawata Provincial Road” ang kasamtangang CMGP proyekto sa Davao del Norte, duna sab sa Carmen ug Sto. Tomas sa ikaduhang distrito nga pulos nagpadayon ang construction. Naglaom ang probinsya nga makadawat pa ug dugang pondo sa umaabot gikan sa CMGP.