BISAN kung matawag ginagmay’ng ayuda ug serbisyo ang dala sa Oplan TAbang sa Barangay sa Nanginahanglan ug Galisod (Oplan TABANG), alang sa ordinaryong tawo dako kini’g bili.
Sa mga residente sa Sto. Tomas Barangays nga San Jose, Magwawa ug mga sitios diin gipahigayon ang Oplan TABANG (Septyembre 18-20), ang hatod nga mga serbisyo nga gipangunahan ni Gobernador Edwin I. Jubahib (Kuya Gob) nakahatag kahupayan gikan sa sakit ug gastos ingon man kahigayonan aron mokita.
“Ang akong nakuan sa Oplan TABANG kining pag-opera sa akoang cyst, mga tambal, pag-training sa pagluto ug bukhayo mao na akong nahibal-an karon,” matod ni Rogelio Alcos, 62 anyos nga taga San Jose, Sto. Tomas.
Dugang ni Rogelio nga sulod sa napulo’g lima ka tuig wala niya mapa-operahi ang cyst tungod sa kakulangon.
“Dugay na, mga 15-anyos seguro, dako na man kaayo. Wala, kay mahal-mahal ang magpa-opera. Karon nga naay Oplan TABANG dako kaayo ko’g pasalamat nga naoperahan nga wala ko’y gasto bisa’g piso. . Dako kaayo ko’g pasalamat kang Governor Jubahib ug sa iyang mga kaubanan kay kung wala ning Oplan TABANG dili gyod maoperahan ang akong cyst. Nagpasalamat kaayo ko. Salamat kaayo kang doktora ug sa iyang mga kaubanan,” todo-pasalamat ni Rogelio.
Alang sab sa mga service providers, ang paghatag ug libreng serbisyo maoy usa ka dakong oportunidad.
“Okey naman, masaya. Partner ng job, tumulong talaga. Thank you din, opportunity sa amin,” matod ni Dr. Casim gikan sa Davao Regional Medical Center (DRMC), usa sa mga partner-ahensya sa Oplan.
Alang kang Lorena Tejano, kahupayan gikan sa gastos, panahon ug kabug-at sa sayop nga entries sa birth certificates.
“Magpausab, kay naay mali sa middle name ug sa ilahang amahan naa po’y mali. . Dako kaayo’g pangayo’g bayad 2,700 baya pangayo ana. . Kay governor dako kaayo’g pasalamat, dako kaayo’g tabang nga mausab ang birth sa akong mga anak kay dako baya’g gastohonon, kay kailangan sa eskuylahan, daghan jud kaayo’g mali. . Salamat kaayo sa mga nag-sponsor ani governor, syempre apil pod si maam, si attorney. Salamat kaayo ma’am,” pasalamat ni Lorena.
Si Adela Narvasa maoy usa lamang sa sobra kalim-an (50) ka mga tawo nga nag-apil sa mga livelihood training sa Oplan TABANG.
“Para maka-extra income kay parehas karon naa ko sa canteen, ang mga luto magamit kaayo nako. . Para ang mga procedure dili nako malimtan tong sa bukhayo, puto ug kining karon sa haplas. .
Nagpasalamat gyod ko makatuon pod mi ug laing mga proseso. Parehas aning herbal makahimo mi ana tapos maka-income na pod kay mas baba kay gamay ra’g palitonon, ang mga dahon naa ra sa palibot. Salamat gyod ko ni Gov, sa LGU, sa municipal ug mga nag-training pod ,” matod ni Adela nga abtik naglista sa mga sangkap ug proseso.
Kini na ang ikaduhang paghatod sa Oplan TABANG human sa Talaingod sa daghan kaayong serbisyo nga giuna gayod ang mga dapit ilawom sa Geographically Isolated and Depressed Areas (GIDAs).
