SENTRO sa administrasyon ni Gobernador Edwin I. Jubahib (Kuya Gob) ang kalamboan dili lang sa pipila apan sa matag pamilya nga nagpuyo sa tibuok Davao del Norte nga giuna ang anaa sa hilit ug wala kaayo maserbisyohi sa kagamhanan.
Usa na ang programang Oplan TApok sa Barangay Alang sa Nanginahanglan ug Galisod (Oplan TABANG) nga gimugna aron aboton ang tanang 223 ka barangays nga giprayoridad ang anaa sa Geographically Isolated Depressed Areas kun GIDAs sama sa San Jose ug Magwawa ingon man mga sitios Lunes, kagahapon human sa malampusong paghatod didto sa Talaingod.
“Karong buntaga naa ta para sa Oplan TABANG. Medyo gamay lang ang nagtapok kay isa lang ni ka barangay, sa taga San Jose. Giunsa pagpili ang mga barangays nga naa man ta’y 223 sa tibuok probinsya? Giuna kadtong na-identified under sa GIDAs nga giila sa DOH uban sa AFP,” pasabot ni Probinsyal Administrador Engr. Josie Jean R. Rabanoz.
Klase-klaseng serbisyo ang dala sa Oplan TABANG nga nagprayoridad sa Health Services lakip na ang Social Services, Legal, Animal Health & Livestock, Roads & Infrastructures, Youth Development, Environmental & Peace Education, Crops & Fisheries, Promotion of Good Governance, Livelihood Opportunities, Civic Works ug daghan pang uban hatod sa hiniusang ahensya gikan sa DavNor Kapitolyo, LGUs, national agencies, lain-laing asosasyon ug korporasyon ingon man mga club sama sa Kiwanis Club International ug Rotary Club.
“Nganong giuna pag-ayo ang panglawas? Tungod kay mao ni pinakaimportante. . . Atong gihataga’g prayoridad kay daghan sa atong mga kaigsoonan nga dili moadto sa ospital. . Way pamasahe. . moingon kalentura raman ni, sakit raman ni sa tiyan, gutom raman ni. Wa sila kahibalo nga naa na’y symptom, sinugdanan padulong mo-acute ug anha na mopahatod ug hospital kung grabe na. Mao na atong gi-anticipate, gihatod ang Oplan TABANG para ma-check-up ang atong mga kaigsoonan nga gahi moadto ug hospital. Syaro di pa mo pa-check-up nga libre na gyod ni, wa na mo’y gasto’g pamasahe,” matod ni Kuya Gob sa iyang mensahe atubangan sa mga taga San Jose, Sto. Tomas.
Gusto ni Kuya Gob nga maserbisyohan ang tanan, way mabiyaan.
“Kamo ang naka-sentro sa among serbisyo. . dili para sa among kaugalingon kundili para gyod sa matag usa kaninyo kay kamo ang among mga amo. Kaming tanan nagtrabaho gi-sweldohan sa gobyerno, kami ang inyong sulugoon. Busa kung moadto mo sa Kapitolyo, asikasohon mo dayon kay mao na ang atoang pamaagi karon, kamo ang pinakaimportanteng tao dinhi sa atong probinsya. Usbon nako, ang atong pang-gobyerno dire sa Davao del Norte, naka-sentro para sa kalamboan sa matag pamilya sa tibuok Davao del Norte,” padayong pasabot sa gobernador.
Aron epektibong mahatod ang gikinahanglang mga serbisyo, gihiusa ni Kuya Gob ilawom sa singgit nga “One Team, One DavNor” ang tanang opisyales sa probinsya gikan sa pinakataas ngadto na sa ubos.
