Sorpresa nga gihatagan ni Mayor Sara “Inday” Duterte ang mga estudyante ug ginikanan sa Dujali Central Elementary School atol sa ika-20 katuig kasumaran sa lungsod sa Braulio E. Dujali.

Kapin 500 ka mga bag sa pagbaBAGo ang gipang apud-apud sa Mayor ngadto sa mga nanginahanglang estudyante ug mga ginikanan sa maong munisipyo nga adunay sulod nga school supplies ug family planning kits.

Sa iyang mensahe, gidasig sa Mayor ang mga ginikanan sa kaayuhan sa tamang pagplano sa pamilya, lakip na ang seryoso nga pag-eskwela sa mga estudyante aron malingkawas sa kalisud.

“Kung ang atong anak mapahuman na nato sila ug college, di nana sila magbalik-balik sa atoa sigeg pangayo ug kwarta. Ang cycle sa kawad-on, ang cycle sa kalisud dili magbalik-balik sa atoang pamilya”, matod pa ni Mayor Inday.

Si Gob del Rosario, kinsa anaa sa maong panagtigum gihagit usab ang mga kabatan-on ug mga ginikanan nga nakadawat sa maong pahalipay nga ipadayon ang pagtarong sa pag-eskwela aron makab-ot ang maayong kinabuhi.

“Ang Pilipinas maglisud ug asenso kung ang mga tao dili buotan. Mao nga kanang bag ng pagbabago ninyo ibutang ninyo sa huna-huna nga kinahanglan kitang tanan magbag-o na. Kamo nga mga bata importante humanon ninyo ang pag eskwela. Karon wala nay rason na dili mo mag-college pinaagi ni Presidente Rodrigo Roa Duterte, libre na karon ang kolehiyo”, segun sa gobernador.

Gikalipay ni B.E. Dujali Mayor Atty. Leah Marie Moral-Romano ang pagbisita sa anak sa presidente ingon man ang pagpanghtag niini sa maong mga bag isip pagpakita sa importansya sa edukasyon ug saktong pagplano sa kadak-on sa pamilya.

“Dako kaau mi ug pasalamat tungod kay gibisita mi sa Presidential Daughter Mayor Inday Sara Duterte. Mao na ang among gikalipayan sa pagselebrar sa among Araw ng Braulio E. Dujali,”sulti sa Mayora.

Apil sa gipasalamatan ni Mayor Moral-Romano ang pagdala sa mga nag-unang serbisyo sa sa probinsyal nga panggamhan ngadto sa ilang munisipyo sulod sa lima ka adlaw isip kabahin sa mga ‘highlights’ sa ilang selebrasyon pinaagi sa B.E.S.T. P.E.O.P.L.E. Festival of Services ubos sa administrasyon ni Gov. Anthony del Rosario.