Mihunat ug duha ka puntos si James Younghusband nga maoy  nakapabuhi sa Davao Aguilas atol sa himatyon nga minutos sa second half sa dula nga miresulta ug tabla batok Kaya Football Club [2-2] sa unang round sa 2nd season Philippine Football League, Dominggo, Marso 4 didto sa  Davao del Norte Sports and Tourism Complex Stadium.

Unang mikamada ug puntos ang 3rd placer sa 1st season nga Kaya FC nga gipangunahan ni Robert Lopez Mendy 17 minutos sa first half ug gisundan sa ikaduhang sipa ni Connor Reece Tacagni pagsugod sa second half nga maoy gikaluya sa mga supporters sa Davao Aguilas FC.

Apan sa pagpadayun sa dula, gibag-o ni Davao Aguilas FC Coach Marlon Maro ang taktika pinaagi sa pag usbaw ug rotational players nga maoy mibungkag sa hugot nga depensa sa Kaya FC.

Misibaw ang makabungog nga hugyaw human miiskor ang unang patid ni James Younghusband 51 minutos ang nilabay sa orasan nga gisundan pa gyod kini sa ikaduhang puntos sa misunod nga walo ka minutos hinungdan nga nakatabla.

Gipaningkamotan sa Aguilas nga balance ang depensa ug opensiba aron di na kini malusotan pa sa nabilin nga mga minutos sa dula.

Gibutyag ni Coach Maro nga ang rotational players strategy ang dakug kahimoan “that results a quick equalizer” sa maong sangka.

“When I changed players and switched the rotation of my offenders, we were able to stop the combination of Kaya… and overload more attacking players,” butyag ni Coach Maro sa closed presscon human ang sangka.

Asoy usab sa coach nga maayo ang resulta sa maong dula bisag wa mapildi niini ang kalaban.

“I see the true character of my players. It’s a good sign to progress in our next matches”, matud ni Maro.

Sa laing bahin, mapasalamaton si James Younghusband sa tanang nag suporta sa Davao Aguilas.