UNANG adlaw, 1,637 ka mga tawo ang nalista aron modawat ug lain-laing serbisyo sa BEST PEOPLE Festival of Services nga gipahigayon didto sa Dujali Elementary School, B. E. Dujali Byernes, Marso 2, 2018.

Bisan pa sa pagbunok sa ulan pagkahapon, kini maoy sobra 400 ka gatos ang kadaghanon kung itandi sa unang adlaw sa Caravan of Services didto sa Limbaan, New Corella niadtong Pebrero 19-23.

“Unsa man ning Festival of Services? Usa ni ka pyesta sa halos usa ka gatos nga mga programa, proyekto ug serbisyo nga regular ginahatag sa atong Kapitolyo, national government agencies ug ang atong municipal government headed of course by Mayor Moral-Romano,” mainitong pagtimbaya ni Gobernador Anthony del Rosario sa mga Dabaonon gikan sa Poblacion Dujali, Cabay-angan, New Casay, Magupising ug Tanglaw.

Ilawom sa BEST PEOPLE development agenda, katuyoan sa administrasyon ni Gobernador del Rosario nga ipaduol ang mga serbisyo aron makadaginot ug kwarta ingon man panahon ang mga Dabaonon ilabina kadtong atua sa hilit nga lugar.

“Tungod sa kalayo ug tungod sa mga requirements ang uban sa inyoha gipili na lang nga dili na mo-avail sa among mga serbisyo. . Pero karon, dire na mismo sa inyong lugar kay among gipaduol ang mga programa, serbisyo gikan sa Kapitolyo paingon dire sa inyong munisipyo. Kini ang hiniusahang pwersa sa provincial government, national government ug municipal government sa Braulio E. Dujali,” pasabot sa gobernador.

Gawas sa mga libreng serbisyo, giisip sab sa gobernador nga ang BEST PEOPLE Festival of Services maoy usa ka maayong pamaagi aron madunggan ang tinuod nga panginahanglan, prayoridad nga proyekto ug programa nga makatubag sa panginahanglan tungod sa gibayad nga buhis sa katawhan.

“Dili namo ni kwarta ang gigamit sa ingon ani nga programa, proyekto ug serbisyo. Hinumdomi dili namo ni kwarta, inyo ning kwarta pinaagi sa inyong pagbayad ug buhis. Ug sakto lang nga ibalik namo ning kwartaha kaninyo pinaagi sa mga maayong programa ug proyekto. . Bisan ang atong Presidente Rodrigo Roa Duterte miingon nga kinahanglan ibalik sa katawhan ang buhis nga ilang gibayad pinaagi sa mga maayong programa ug proyekto. Pahinumdum lang nako sa tanan, ang tinud-anay nga pagserbisyo dili angay ipanghambog, dili pod angay ipang-hadlok,” esplikar ni Gob AGR.

Mapasalamaton kaayo si Mayor Atty. Leah Marie Moral-Romano sa pagdala sa Caravan of Services.

“Dako kaayo ang atong pasalamat mga taga Braulio E. Dujali nga gidala sa atong probinsya ang mga services sa Capitol mismo dire sa atong tugkaran. Daghan kaayong mga serbisyo ang ilahang gidala para sa atoa nga dili na ta kinahanglan nga moadto pa ta sa Tagum. Lipay kaayo,” pahayag pasalamat ni Mayor Moral-Romano.

Nga wala sab pasagdi ang regular nga serbisyo sa DavNor Kapitolyo, ang naasayn nga mga empleyado mihatod sa mga serbisyo uban sa mga nasyonal nga ahensya sa AFP, PNP, Provincial Prosecutors Office, TESDA, PAO, LTO, DSWD, DFA, PSA, COMELEC, DENR, DA, DRMC ug DOH kauban ang munisipyo sa BE Dujali.