NASALBAR ang 84 ektaryas nga basakan nga nahimutang sa Purok 2A Limbaan, New Corella, Davao del Norte dihang gipatubigan kini pinaagi sa lima ka water pumps nga gipahulam sa probinsyal nga panggamhanan sa Davao del Norte.

 “Kaluoy sa ginoo adtong karon lang bag-o gihatagan mi ug pump. Ang 84 hectares namo na-deserved gyod namo tanan ang basakan. Napatubigan namo tanan, na-sustain namo ang among panguma tungod adtong pump. Nagpasalamat mi sa probinsya nga gitagaan mi ug pump nga lima ka buok,” matod ni Joel Daw-og ang presidente sa Lower Limbaan Communal Irrigators Association (LLCIA).

Pinaagi sa Provincial Agriculture Office (PAGRO) ang administrasyon ni Gobernador Anthony del Rosario adunay gigahin alang sa “El Niño Mitigation Fund“aron matabangan ang mga mag-uuma sa humay.  

“Ang among dam naguba niadtong Pebrero 15, 2016. . Mao ni ang una nga produkto sa lima ka water pump. . amo lang ampingan nga dili maguba kay kung maguba kami maoy mobayad, silbi ang among asosasyon. . . Wala mi paarkilaha, iuli lang inig kaluy-an mapulihan na mi ug dam. Ang krudo, ang asosasyon na. . Gikaluy-an pod nga karon among area booting stage na ang bunga, naa na pod mo-harbesay,” pasalig ni Joel nga ila gyod ampingan ang hinulaman nga water pump.

Gawas sa lima nga gihulaman sa LLCIA, matod ni Engr. Leonilo Patayon sa PAGRO nga duna sab isa (1) ka water pump ang gipahulam sa taga Asuncion tungod kay nangliki na ang ilang basakan gumikan kay wala una paagii ug tubig ang kanal sanglit adunay gihimo nga pag-repair.

Halos dili mabugto ang pasalamat sa presidente sa LLCIA sa tabang nga nadawat nga nagsalbar sa ilang basakan.

“Nagpasalamat gyod mi ug dako kay kung wala gyod nang water pump, wala man gyod mi. Nagpasalamat pod ko sa among mga miembro nga nagkaghiusa mi,” pasalamat ni president Joel.