MAAYO ra ang resulta sa gihimong third cropping sa humay nga gisulayan didto sa New Visayas, Sto. Tomas, Davao del Norte.

Ang demonstration farm diha sa 70 ektaryas nga gidumala sa 49 ka farmer-cooperators, ang uban nagsugod pagtanom niadtong Septyembre 10, 2017 ug gisugdan na sab ang pag-ani kataposan sa Enero, 2018. 

“Positive generally. Naa lang siya’y occurrence sa pests and diseases nga maoy napakaubos sa ilang abot pero generally out of 70 hectares maayo man gyod ang iyahang abot. Wala ko mawad-an ug paglaom nga ato gihapon mapadayon ning third cropping season para gyod makatabang ta sa sufficiency dire sa Davao del Norte,” matod ni Provincial Agriculture Office department head Dr. Anastacia Notarte atol sa Harvest Festival Byernes, Pebrero 2.

Bisan kung wala pa mahuman ang ani apan naglaom ang mga personahe sa Agrikultura nga mag-average ug dili momenos 3 ka metriko tonelada (MT) ang abot sa matag ektarya base usab sa ani sa 5 ka farmer-cooperators. Tumong sa ikatulong cropping sa humay nga motaas pa ang rice sufficiency sa Davao del Norte nga aduna lamang 86%.  

Reklamo ni Alejandro Siglos, usa ka farmer-cooperator nga alang kaniya ang dakong hinungdan sa pag-ubos sa iyang abot maoy tungod kay ang kadaghanan wala magtanom ug ang mga insekto ug peste naka-concentrate sa ilahang uma.

“Ok tong sa una kay magkadungan man gud. . Naa tanan klase sa mananap. . Kung mouyon ang tanan, mopadayon ko,” matod ni Siglos nga andam siyang third cropping gihapon apan nga unta magtanom sab ang uban.

Gipahungaw sab ni Liberato Flaviano ang iyang kaguol nga ang iyang isa ka ektarya 40 sakos lang abot.

“Dako ug deperensya. . sa una, pinaka-mubo 90 kapin. . . ambot kini karon kung moabot ba ug 40. . Kay ang yuta way pahuway, ang mananap mobalik-balik lang,” matod ni Liberato samtang nagpa-thresher sa iyang humay.

Tungod kay ang ubang farmer-cooperators sa third cropping sobra 80% sa naandang abot nga 102 ka bag matag ektarya, gipakita ni Dr. Notarte ang usa sa nakitang hinungdan sa pag-ubos sa abot mao ang “cultural management” kun pag-atiman sa tanom. Iya sab gitandi ang abot sa “subing” (shoots) kumpara sa third cropping.

“Dili sila mosunod sa atoang gipatupad nga technology. Ang best way sa stemboarers is handpicking of egg. At 45 days after transplanting mosugod na sila ug handpick. . Bahin sa blackbug seasonal na siya. . Ang control measure ana imo na siyang patubigan ang basak. . Expected na siya nga off-season dasmagan gyod sa sakit ug dangan. Pero generally speaking naka-recover ra man pod ang ilang humay. . Pinaka-maximum nga makuha sa subing is 15 bags per hectare samtang ang 3rd cropping ang average maoy 3MT matag ektarya,” pagtandi sa agrikulturista.

Human sa assessment program, nagmiting ang mga farmer co-operators kauban ang mga personahe sa PAGRO sa tumong nga pasabton sila sa mga bentaha ug dili mohunong nga i-aplikar ang bag-ong teknolohiya.

Ang third cropping sa humay sulayan sab sa mga lungsod sa Carmen, New Corella, Asuncion, San Isidro ug Kapalong.