Kini ang gipaabot nga mensahe ni Gobernador (Kuya Gob) Edwin I. Jubahib samtang iyang gitunol ang hinabang alang sa mga Persons With Disabilities (PWDs) ug mga Senior Citizens (SCs) sa iyang paglibot tibuok probinsya sulod sa tulo ka adlaw, Hulyo 20-22.
Sa unang adlaw gilibot ni Kuya Gob ang Tagum City, Asuncion, New Corella, Kapalong ug San Isidro ug tungod sa nagsapaw-sapaw nga eskedyul, ang iyang Executive Assistants ang mihatod sa iyang mensahe sa ikaduhang adlaw didto sa Distrito 2.
“Ang mensahe sa atoang Gobernador usa ka “message of hope.” Kini naghatag ug paglaom labina sa mga sektor sa Senior Citizens ug PWDs. Kasagaran baya kining duha ka sektor maoy malimtan, unya di tiaw nga mahimong bahin sa inyong sektor. Nalimtan na gani kasagaran, unya bation pa gyod nga “wa na man seguro ko’y mabuhat kay edaran na man ko.” Unya sa PWDs—“dili ko mobile, dili parehas sa uban nga lagsik.” Mao nang si Kuya Gob nagpahinumdom nga “Wala kamo kalimti. Hindi kayo nag-iisa. No one is left behind,” paghatod ni Architect Jong Fuerto sa mensahe ni Kuya Gob didto sa mga LGUs sa Distrito 2 lakip ang Carmen.
Alang sa mga PWDs ug SCs, ang ginagmay’ng hinabang bugas giapilan sab ug mga tambal pang-maintenance sa hypertensions, diabetes ug katambok.
“Kung atong lantawon dili baya ni igo. Di man ni molungtad ug tulo ka bulan. Kining mga tambal seguro isa ka bulan mahurot na man. Dili gyod ni igo. Pero ang labing importante niini ang mensahe nga gipaabot sa atong Governor: nga bisan sa kagamay, it’s the thoughts that counts. Wala gyod mo kalimti,” padayong paghatod ni Architect Fuerto sa mensahe nga nagpahinumdum sab sa responsibilidad sa matag usa-- ang “pagtinabangay” ilabina ning panahon sa pandemic nga mag-obserbar sa health protocols labot sa pagsul-ob ug facemask, physical distancing ug kanunay’ng panghugas sa kamot.
Mapasalamaton gayod ang tanang LGUs.
“Ang akong ikasulti karon usa ka dako, importante nga pulong: ang pulong pag-pasalamat. Mapasalamaton kita sa atong Governor Kuya Gob Jubahib kay despite sa iyang ka-busy wala gyod niya kalimti ang mga persons with disabilities, mga senior citizens. Naa gyod ta’y motto nga nag-ingon: “No sector shall be left behind.” Meaningful kaayo ang paghatag sa atong Governor sa iyang ayuda sa akong mga “age-mate” ug sa mga persons with disability tunong gayod sa semana sa National Disability and Prevention Week. Unsa man ta sa katilingban, unsa man ang atong kahimtang, wala gyod ta kalimti sa atong Governor,” pasalamat ni Carmen Mayor Virgie Perandos nga usa na sab ka Senior Citizen.
Gawas sa padayong paghatod sa ginagmay’ng hinabang, nagsugod na sab ang administrasyon ni Kuya Gob sa “malungtarong tabang” pinaagi sa bag-ong programang “DavNor KAAGAPAY, ang KAwsa sa AGrikultura ug PAnginabuhian sa barangay.
