Mapasalamaton ang administrasyong Kuya Gob Edwin I. Jubahib human nakadawat ug 600 ka mga swab test kits nga gitunol sa USAID ngadto sa probinsyal nga panggamhanan sa Davao del Norte nga girepresenta ni Provincial Administrator Engr. Josie Jean Rabanoz, kagahapon, Hulyo 13.

Matud pa ni Dr. Eleanor Salva, Provincial Health Officer I, ang maong mga swab test kits gamiton alang sa testing sa mga Overseas Filipino Workers (OFW) ug Locally Stranded Individuals (LSI) lakip na niini ang ilang mga pamilya ug mga frontliners nga adunay close contact sa mga tao nga nakabenepisyo sa Hatid Probinsya program.

Gibutyag ni Richard dela Cruz, representante sa USAID project ilawom sa Infectious Disease Detection and Surveillance, andam muhatag ug ayuda ang maong organisasyon aron mapugngan ang pagkuyanap sa COVID-19.

Sa laing bahin, nakatala ug unang kaso sa local transmission ang Monkayo, Davao de Oro kagahapon nga nihatag ug kabalaka bisan sa silingan niini nga mga probinsya.

Sa kasamtangan, adunay 76 ka natala nga mga kaso sa COVID-19 sa Davao del Norte kung diin 46 pa gihapon ang aktibo, samtang dunay 26 ka recoveries ug 4 deaths.