Gidayeg sa Department of Agriculture (DA) - 11 si Kuya Gov. Edwin I. Jubahib sa paspas nga pagpatiwas niini sa mga proyekto ubos sa Philippine Rural Development Program (PRDP).

Ingon ni DA-11 Regional Technical Director Marila Corpuz, ang head sa PRDP-Regional Project Coordination Office (RPCO)-11, nga nalipay ang kadagku-an sa departamento sa pagtapos sa gobernador sa mga proyekto nga natanggong.

"Si Kuya Gob man of action jud ni," sulti sa opisyal, atul sa groundbreaking sa Improvement of Sto. Tomas Organic Production Common Service Facility, sa Bobongon, Sto. Tomas, Davao del Norte.

Dugang ni Corpuz nga sa kapaspas sa implementasyon sa Davao del Norte, dako kini'g tabang sa pagkab-ot sa target nga 80 percent disbursement sa PRDP funds sa Davao Region.

Kinahanglan ni aron makakuha na pud og dugang pondo ang probinsya.

Ang maong proyekto sa Sto. Tomas, nga mokantidad sa P9.5 million, mohatag benipisyo sa kapin 3,000 ka pamilya.

Gisugdan kini'g proseso sa tuig 2016 pa ug apil kini sa bilyones ka mga proyekto nga gibiyaan sa miaging administrasyon.

Upat sa mga PRDP projects nga nagkantidad og P171 million ang bag-ohay lang nahuman ug giinagurahan ni Kuya Gob sa milabay nga semana.

Kini gipangtiwas og implimentar ni Kuya Gob, sa iyang tuyo nga dili masayang ang kwarta sa katawhan, gawas sa kaayuhan nga mahatag niini sa paglambo sa katawhan.

"Gusto nako nga walay masayang nga proyekto. Bisan nagkantidad lng og P20,000, sa ngalan nga kini gihatag sa national govt, di ko mosugot nga ma-return ang funding," sulti ni Kuya Gob.