News

Delegasyon sa Probinsya sa Abra nag-benchmark sa katukoran sa Davao del Norte Learning Institute

Nagpungasing pangutana uban sa paghinam-hinam nga makisayod sa mga best practices sa Probinsya sa Davao del Norte labi na ang kamugnaan sa Davao del Norte Learning Institute (DNLI) aron ilang kapanaminan ug maimplementa sa ilang kaugalingong probinsya. Kini ang tumong sa mga delegado gikan sa probinsyal nga panggamhanan sa Abra. Gipahinabo ang "benchmarking" sa Bulwagan ng Karunungan, Provincial Capitol, Mankilam, Tagum City, Septyembre 15, 2023.

Si Mervin Jay Z. Suaybaguio, PhD., DDM, ang Provincial Information Officer ug mao usab ang DNLI Executive Director nipasabot sa delegasyon ug nibatbat sa katukoran sa nahisgotang institusyon nga adunay tumong sa pag-uswag sa katakus sa mga empleyado sa gobyerno alang sa maayong pagdumala ug kalamboan sa lokalidad.

Kahibaloan nga mas gipalig-on ang pag-establisar sa DNLI pinaagi sa ordinansa sa probinsya nga gipondohan kapin milyones ka pesos ubos sa Provincial Governor's Office ug ang operasyon gipangunahan sa Provincial Information, Communication, Knowledge and Management Office (PICKMO).

Ang DNLI nga karon nakighiusa sa Davao del Norte State College nagtanyag sa kursong Bachelor of Science in Midwifery (BSM), Certificate in Preschool Education s(CPE), Bachelor of Science in Entrepreneurship (BSEntrep), Bachelor of Public Administration (BPA) ug uban pa. Ang pagmugna sa naasoy'ng institusyon nahisubay sa development thrust sa probinsyal nga panggamhanan sa Davao del Norte sa pagpromotar sa edukasyon ug pagpangempleyo ilalom sa KUYA GOB NG MASA Development Agenda. Ang serbisyo sa DNLI padayong natagamtaman sa mga trabahante gikan sa kapitolyo, sa ubang mga LGUs, ug sa mga ahensiya. Ubay-ubay na usab ang nakagradwar niini pinaagi sa libre o gipabarato nga pagtungha.

Usa sa mga nag-benchmark nga si Letecia Madriaga, Abra Learning Institute (ALI) Directress, nasurpresa sa mga nindot nga libreng tanyag sa DNLI ngadto sa mga empleyado sa gobyerno uban sa pagpasalamat sa mainitong pag-abiabi kanila. Kuyog ni Madriaga sila si Nora Damsen, Katherine A. Pacsa ug uban pang mga miyembro sa delegasyon sa Probinsya sa Abra.

"So, we are learning a lot from you. I am learning a lot from you. And we have a lot of questions in my mind. How can I ever give this or deliver this to our province? So, that alone can be an inspiration for all of us who are here," butyag ni Madriaga.

Writer/Photos: Maria Lorna P. Tripoli

 

 

 

DavNor News