News

2023 Gawad Parangal alang sa mga kooperatiba gitigayon

Gikan sa pinakagamay hangtod sa pinakadakong kooperatiba ang gipasidunggan atol sa 2023 Gawad Parangal: Search for Most Outstanding Cooperative sa probinsya sa Davao del Norte. Gilangkoban kini sa upat ka kategorya diin mga plake ug cash prize ang gipangtunol sa aktibo ug malamboong pagdumala sa maong sektor.

Gawas sa plake, nakadawat usab og P25,000 salapi ang Most Outstanding Coop sa Large, Micro, Medium ug Small Enterprises category, P20,000 ang 1st runner up ug P15,000 ang 2nd runner up.

Sa Large Enterprises category, 1st runner up ang Visayan Village Tagum Rural Waterworks and Multipurpose Cooperative (VITRUWASCO), 2nd runner up ang Checkered Farm Agrarian Reform Beneficiaries Multipurpose Cooperative (CFARBEMPCO) sa Panabo City ug ang Kapalong Cooperative maoy giilang Most Outstanding Coop sa maong kategorya.

Sa Medium Enterprises Category, 1st runner up ang NIA Saug Employees and Irrigators Multipurpose Coop sa lungsod sa Asuncion, 2nd runner up ang Davao del Norte Government Officials and Employees Multipurpose Cooperative (DAGOEMC), ug ang napiling Most Outstanding Coop mao ang Kapalong Government Officials and Employees (KAGOECO).

Sa Small Enterprises Category napiling Most Outstanding Coop ang Kauswagan Agri Development Multipurpose Cooperative (KADEMPCO) sa Panabo City, 1st runner up ang Almaca Banana Growers Multipurpose Coop sa lungsod sa Carmen, ug 2nd runner up ang Mauswagon and Malampuson Farmers Irrigators Multipurpose Cooperative (MAMFIC) sa Sto. Tomas.

Samtang sa Micro Enterprises Category ang Kauswagan Water and Sanitation Cooperative (KAWASACO) sa Panabo City maoy Most Outstanding Coop, nga gisundan sa Sto. Tomas Individual Farming Agrarian Reform Beneficiaries Coop (SIFARBCO), ug St. Joseph Multipurpose Cooperative isip 2nd runner up gikan sa Carmen. Consolation prize usab ang nadawat sa wala nasampit nga mga kooperatiba.

Ang pagpasidungog gipahinabo sa DavNor gym, Oktubre 25, nga gitambongan sa gatosan ka mga miyembro sa kooperatiba atol sa panapos nga selebrasyon sa Cooperative Month. Nitambong sila Usec. Joseph B. Encabo, ang Cooperative Development Authority Chairman, Provincial Administrator Engr. Josie Jean R. Rabanoz, kinsa nagrepresenta usab ni Governor Edwin "Kuya Gov" Jubahib, mga city/municipality ug provincial cooperative development councils, Board Member Emmanuel G. Pamisaran, Chairperson Committee on Coops sa Sangguniang Panlalawigan, ang PADO-CIDD ug uban pa.

Ang kooperatiba giila sa gobernador nga katambayayong sa pag-uswag sa ekonomiya sa probinsya labi na ang paghatag og panginabuhian sa mga katawhang Dabaonon.

"The search for most outstanding cooperative in the Province of Davao del Norte hass purposely brought this share as part of our celebration of the National Cooperative Month to spotlight and recognize the remarkable work done by our cooperatives, large and small, in contributing to the socio-economic development of our province," matud ni Engr. Rabanoz.

Writer/Photos: Maria Lorna P. Tripoli

 

 

 

DavNor News