News

Ayuda gikan sa OVP ug OCD nagpungasi

Nagpungasi ang mga ayudang relief foods gikan sa Office of the Vice President (OVP) ug Office of the Civil Defense (OCD) nga gitunol sa liboan ka mga katawhan sa Siyudad sa Tagum.

Niadtong Marso 13, ning kasamtangang tuig, ang OVP mitunol og ayudang tag-lima ka kilong bugas sa Barangay Bincungan alang sa 1,846 ka mga pamilyang naapektohan sa kalamidad. Ang nasampit nga barangay maoy usa sa mga grabeng naapektohan sa baha resulta sa shearline ug trough sa low pressure area niaging mga bulan. Kahibaloan nga ang buhatan ni Bise Presidente Inday Sara Duterte Carpio nagpadala og hinabang bugas alang sa probinsya sa Davao del Norte nga gitunol na sa nagkadaiyang lungsod.

Sa pikas bahin, ang Office of the Civil Defense (OCD) mitunol sab og hinabang bugas alang sa tulo ka mga barangay niadtong Marso 18. Kini mao ang mga barangay sa La Filipina nga adunay 2,257 nga mga pamilya, Barangay Pandapan-128, ug Barangay Magugpo East alang sa 1,439 nga mga nabahaan.

Sa distribusyon sa relief foods, gipasalamatan ni Bise Mayor Allan Rellon ang tabang gikan sa bise presidente alang sa mga Tagumeños. Samtang gipasabot sa representante ni Governor Edwin "Kuya Gov" Jubahib nga si Atty. Eva Estabillo, nga ang gobernador nisuporta sa tanang programa ug ayudang ihatag sa mga nasudnong ahensiya ug mga opisyal sa panggamhanan alang sa pagtabang sa mga nabahaan. Hugtanon niining gipanghimakak ang mga alegasyon ug gipasiatab sa uban nga nibabag si Gov Jubahib sa mga tabang gikan sa nasyonal.

"Regarding ani nga mga fake news ug gusto niyang gipaklaro gyud sa inyoha nga dili tinuod. Kinsa may nakadungog nga giingon nga gibabagan ni Gov ang pagpanghatag og ayuda? Naay nakadungog? Naay ningisi, pasabot naay nakadungog? Naay nagsulti man gud nga kana si Edwin babagan ang pagpanghatag sa ECT, gibabagan ang AICS, ang TUPAD, dili na tanan tinuod. In fact, si Gov nagpaningkamot na’g adto sa mga senador, adto sa atong bise presidente, adto sa presidente makakuha og budget pang ayuda," sulti ni Atty. Estabillo.

Ang relief operation nagapadayon hangtod karon sa pagpanguna sa Provincial Social Welfare and Development Office (PSWDO), nga gitambongan nila Board Member Prospero "Popo" Estabillo, Jr., BM Nicandro Suaybaguio, Jr., BM Francisco Remitar, mga konsehal sa Tagum sama nila ni Atty. Ana Alvarez, Ronald "Nono" Elliot, Jan Dmitri Sator, mga kanhi BM Roger Laguna ug Macario Bermudez, mga barangay functionaries ug uban pa.

Writers/Photos: Maria Lorna P. Tripoli

 

 

 

DavNor News