News

141 miyembro sa SAMUPHAI nidawat sa ilang Conditional Contract to Sell

141 ka mga benepisyaryo nga sakop sa San Miguel Homeowner’s Association, Inc. (SAMUPHAI) nga nahimutang sa Prk. Namnama, Cuambogan, Tagum City ang nidawat sa ilang Conditional Contract to Sell gikan sa Probinsyal nga Panggamhanan sa Davao del Norte ubos sa pagdumala ni Governor Edwin “Kuya Gov” Jubahib sa Capitol Pavilion, Davao del Norte Sports and Tourism Complex (DNSTC), Mankilam, Tagum City, Marso 8, ning kasamtangang tuig.

Gipangunahan ni Provincial Administrator Engr. Josie Jean R. Rabanoz, CE, MPA, En.P., ang pagpang-apod-apod sa maong mga papeles isip unang lakang sa hingpit nga pagpanag-iya sa mga benepisyaryo sa luna sa yuta gikan sa Probinsyal nga Panggamhanan.

Sa mensahe ni Kuya Gov pinaagi ni Engr. Rabanoz, nagpaabot sa iyang dakong kagustohan nga maplastar ug hingpit nang maangkon sa mga benepisyaryo ang luna sa yuta. Matud ni Rabanoz nga tuig 2013 pa gisugdan ang proseso sa maong luna sa yuta apan karon lamang sa panahon ni Kuya Gov nahatagan og katumanan.

“It took pila ka years, sa first term pa lang ni Kuya Gov nasugdan. Maayo gani wala pa nahuman ang iyang second term mahatag na gyud sa inyoha. Ug paningkamotan nato kadtong remaining nga 199 nga mosunod karong bulan sa Abril, aron mahuman gyud ang 240 beneficiaries. Sama sa giingon kanunay ni Kuya Gov, kung kinahanglan nga himuon, kung gusto gyud himuon walay rason nga dili mahimo,” matud ni Engr. Rabanoz.

Dugang ni Rabanoz nga human nadawat sa mga benepisyaryo ang Conditional Contract to Sell mosunod niini ang pagpatitulo sa ilang yuta nga paningkamotang matigayon karong tuiga aron matagamtaman nila ang kahapsay ug kalinaw sa ilang panghunana.

Giesplikar ni Atty. Dexter Caligdong sa Provincial Legal Office ang mga proseso nga pagaagian sa mga benepisyaryo una nila hingpit makuha ang titulo sa ilang yuta, labi pa sa gipa-assume ug gi-waive ang ilang lote. Giawhag sab ni Caligdong ang mga benepisyaryo sa pag-“fully paid” sa ilang yuta aron ma-process na ang ilang titulo human ipagawas ang Deed of Absolute Sale.

“Pero dili gihapon nato biyaan kay gusto nato sabay-sabay gyud ta ani mahuman sa proseso. So, unta puhon-puhon magsabay-sabay pud mo og “fully paid” para mapaspas nato og process ang Deed of Absolute Sale ug ang pagpatitulo,” sulti ni Atty. Caligdong.

“In behalf sa SAMUPHAI, mapasalamaton kaayo mi kay Kuya Gov sa pagmugna niining CCS para sa amoang titulo puhon, nga maamoa na gyud ang maong lote. So, daghan kaayong salamat sa inyong tabang nga kani magpadayon ug magmalampuson. Ug magpasalamat pud ko sa atoang tanan, nga kung wala ang inyong suporta dili nato maabot ang ingon ani,” sumala ni Catherine Historya, Presidente saSAMUPHAI.

Kasagaran sa mga benepisyaryo adunay mokabat 80 sqm. nga luna sa yuta sa kantidad P19,700 ug pagabayaran matag bulan sa kantidad P989.

Writer/Photo: Nestor Mata, Jr.

 

 

 

DavNor News