News

OVP padayon ang pagtunol og ayuda sa mga biktima sa kalamidad

Ang Office of the Vice President (OVP) kauban ang Probinsyal nga Panggamhanan sa Davao del Norte pinaagi sa Provincial Social Welfare and Development Office (PSWD) padayon nga mitunol og mga relief foods sa mga nabahaan partikular na sa Purok Magtalisay, Barangay Mankilam, Siyudad sa Tagum. Tag-tulo ka kilong bugas, lima ka canned goods, ug lima ka noodles ang sulod sa usa ka bag nga giapod-apod kanila. Kahinumdoman nga nihimo’g lakang si Governor Edwin "Kuya Gov" Jubahib sa paghangyo sa nasudnong ahensiya ug mga opisyal sa panggamhanan aron matabangan ang mga katawhan.

Mapasalamaton ang gobernador kang Bise Presidente Sara Duterte Carpio sa gitabang nga ayuda kutob sa mga grabeng nabahaan sa Davao del Norte. Si Barangay Kapitan Marlon Rio mapasalamaton usab kang VP Sara sa gitunol nga tabang sa mga lumolupyo sa nasampit nga barangay nga kasamtangang kapin 20 ka mga purok ang grabeng nabahaan. Samtang usa ka residente nagpasibaw sa iyang kaguol sa pagkapalyar sa iyang panginabuhi epekto sa baha.

"Sa atoang Vice President sa Pilipinas si Madam Sara Duterte, daghan kaayong salamat kay nakit-an gyud nimo ang kahimtang sa katawhan diri sa Mindanao particularly in Davao del Norte ug Davao de Oro nga naigo gyud og dakong baha. Salamat sa ayuda ug pagtubag sa panawagan sa katawhan nga pagpangayo og tabang," sulti ni Rio.

"Sige lang kuan ning baha walay kaundangan. Maayo untang moarang na ‘ni kay wala nay kakulian sa atong panginabuhi ba," matud ni Evelyn Pastrana.

Ang relief foods gikan sa OVP alang sa 250 ka mga pamilyang nabahaan sa naasoyng dapit, basi sa talaan sa PSWDO, Pebrero 7, 2024.

Writer: Maria Lorna P. Tripoli

 

 

 

DavNor News