Posible nga sugdan karong Hulyo niining tuiga ang Food Sufficiency Program sa Probinsyal nga Panggamhanan sa Davao del Norte ubos sa pangalan nga DavNor Kaagapay o Kaisa sa Agrikultura at Hanapbuhay sa Barangay. Tumong sa maong programa sa administrasyon ni Kuya Gov. Edwin I. Jubahib nga adunay igo nga suplay sa pagkaon sa probinsya ug matagaan ug dugang panginabuhian ang katawhan.

300 ka mga empleyado sa kapitolyo nga tawagon nga Barangay Extension Workers (BEW) ang hatagan sa tahas sa pagtabang sa katawhan sa mga barangay sa pagtanom ug gulay, prutas, high-valued nga mga kahoy, ug pag-alima ug hayop sama sa manok ug labaw sa tanan ang pag-market sa mga produkto sa katawhan pinaagi sa mobile application nga gidisenyo sa mga IT personnel sa DavNor.

Mupailawom sa training ang mga BEW aron sila adunay igong katakos sa pagtudlo unya sa katawhan didto sa 223 ka mga barangay sa tibuok probinsya. Adunay mga demo-farm nga mamahimo unyang lugar nga diin magtuon ang mga BEW ug uban pang mga personahe.

Sumala pa ni Kuya Gov, hatagan ug sakto nga ayuda ang katawhan sa mga seedlings, planting materials ug mga hayop nga alimahan aron sila makaapil sa maong programa. Dugang pa sa Gobernador, dili lamang kini makatabang sa panginabuhian sa katawhan apan dako pud kini ug ikatabang sa atong kinaiyahan.

#OneDavNorBatokCOVID-19
#BeatCOVID19
#WeHealAsOne