HUMAN sa New Corella ug Asuncion, ang “Highlands to Island” eco-tourism program ni Gobernador (Kuya Gob) Edwin I. Jubahib miabot sa Kapalong alang sa konsultasyon sa pagpalambo sa mga tourism sites sa lungsod, Myerkoles, Pebrero 6.

“Kaning eco-tourism nato isa ka potential ni nga program. . usa nga makapasikat sa lugar ug usa ka dollar-earner. Nakita nako dinhi sa Davao del Norte potential ta tanan; ang tibuok probinsya ‘Highlands to Island.’ This is to become best tourist destinations of the whole world. Naa ta’y pinaka-unique nga tourist destinations. Dinhi sa Davao del Norte naa ta’y mga beautiful caves dili lang Kapalong, New Corella pod. Moingon ka ug waterfalls naa sa ato. Moingon ka ug View Deck naa ta dire sa Talaingod, sa Asuncion,” pasabot sa “gobernador ng masa” labot sa “Highlands to Island package tour” sanglit ang nabantog nga isla sa Palawan ug Siargao halos pulos lang dagat ang ika-offer sa mga turista.

Dugang giklaro ni Kuya Gob nga gikan sa habog nga mga tourism destinations, ang mga turista mopadulong sa patag ug maghuman kini sa isla sa Samal diin abi-abihon sila sa mga puting baybayon.

“Sa Samal Island naa ta’y mga white beaches, marine protected area ang atong corals, gwapo kaayo. Gani sa Samal pa nakita ang ang usa ka corals nga wala sa uban sa Pilipinas. Ingon ana ka-gwapo ang Davao del Norte. Unya kining atong eco-tourism dili nato gub-on ang kinaiyahan. Dili nato usbon kung unsa’y naa nga gihatag sa kinaiyahan. Ato lang i-develop nga mas mahinlo ug mas ma-gwapo ug ma-proteksyonan.”

Gusto sa “gobernador ng masa” nga ma-implementar dayon ang mga plano aron maka-income lakip ang mga gagmay’ng tindera.

“Sa akoa nga administrasyon dili ko gusto’g daghang estorya, kanang promise-promise. Kung mag-estorya ta karon ato nang paningkamotan nga ugma ato na nang mahimo. Ug kaning atong gi-mitingan karon nga eco-tourism, naa na ni siya budget nga naka-ready na, 200 million pesos for the development of the whole province eco-tourism. . Within this year ang target nato nga mahuman, this month of September. Paghuman sa September ablihan na nato sa public. . Mo-generate ni ug income dili lang ang atong municipal, barangays, kundili ang atong mga constituents gikan sa driver hangtod sa mamaligya’g kakanin,” padayong pasabot ni Kuya Gob.

Sa bahin sa Kapalong, ang ilang tanang plano-pangkalamboan nakalinya sa iya sa probinsya.

“To develop tourist destinations, isa ni ka paagi makatabang sa ginagmay’ng ekonomiya sulod sa atong barangay. . Naka-align tanan dire sa probinsya,” matod ni Kapalong Mayor Marites Timbol nga naghisgot sab sa mga programa sa agrikultura, panglawas ilabina ang hospitalization ug uban pang social services.

Human sa Kapalong, ang “Highlands to Island” tourism destinations program ni Kuya Gob mihimo ug konsultasyon didto sa Tagum City hangtod malibot ang 11 ka mga LGUs sa Davao del Norte.

 

 

 

DavNor News