Davao del Norte – MILIHOK dayon ang probinsyal nga panggamhanan ni Gobernador Edwin I. Jubahib human sa Intensity 6.6 nga linog nga mitay-og sa halos katibuk-ang Mindanao, buntag sa Oktubre 29, nga dinhi sa Davao del Norte gibati ang Intensity 5.0 nga gikusgon.

Gipataas dayon ni Kuya Gob ang “Red Alert” sa Provincial Disaster Risk Reduction and Management Council Operation Center, samtang diha-diha nga milibot ang Rapid Damage Assessment and Needs Analysis (RDANA) Team sa pagtino kung adunay ba’y casualties, nga hangtod ning pagsulat walay gikataho nga namatay o kaha nasamdan gumikan sa maong trahedya.

Matod ni Kuya Gob nga importante kaayo sa iyang administrasyon ang kahilwas (safety) sa matag Dabaonon nga nagtan-aw sa pagka-kasaligan sa mga bilding ug ubang imprastruktura sa probinsya.

Sukad Oktubre 29 sa udto, suspendido ang trabaho sa mga buhatan sa gobyerno sa probinsya lakip na ang tanang klase sa publikong mga eskwelahan aron paghatag ug panahon sa DavNor RDANA nga magsusi sa mga bilding kung dili ba kini peligroso na.

Ang inisyal nga taho sa RDANA Team nagtug-an nga adunay ginagmay’ng liki sa Probinsyal Kapitolyo nga bilding ingon man mga bilding sa DavNor Hospital-Kapalong Zone.

Gipasalig hinuon ni Engr. Arsenio Camillada sa Provincial Engineer’s Office nga lig-on pagkahimo ang estruktura sa mga bilding apan dihang nakit-an ang dakong liki sa primary beam sa Engineering Building sa maong hospital, girekomendar niini ang “rebound hammer test” sa pagtino kung luwas ba gayod kini.

Sa Braulio E. Dujali, gitaho ni Mayor Leah Marie Moral-Romano ang namatikdan gagmay’ng liki diha sa tulo ka hayskul bilding, Rural Health Unit ug residensyal nga pinuy-anan

Girekomendar hinuon sa RDANA Team ang pagsirado sa duha ka klasrom sa Dujali National High School ug laing usa diha sa Antonio V. Fruto, Sr. National High School tungod sa daghang liki. Labot sa patubig (water systems) sa tibuok lungsod walay nadaot ingon man mga karsada.

Sa lungsod sa Carmen, may namatikdan gagmay’ng liki sa Anibongan NHS, Guadalupe ES, Lapaz NHS, Minda ES, Sto. Niño ES samtang dakong liki ang nakit-an sa Tubod Health Center. Human sa linog, nababagan ang karsada sa kahoy nga natumba nga dali ra sab naaksyonan.  

Sa Tagum City ginagmay’ng liki ang namatikdan diha sa mga eskwelahan samtang ang mga hospital sa Sto. Tomas walay kadaot nga nahitabo. Ang mga publikong eskwelahan sa New Corella nakitaan ug gagmay’ng mga liki lakip na ang sa Talaingod ingon man ang sa Asuncion.

Padayon ang gihimong paglibot sa tibuok probinsya sa RDANA aron matino ang kadaot ug gidahom nga tangtangon ni Kuya Gob Edwin Jubahib ang suspension sa klase ug trabaho sa dihang madawat na ang kumpletong taho.

DavNor News