ANG DISTANSYA wala makababag aron mahatod ang gikinahanglang serbisyo ngadto sa lima ka nahilit nga barangays Waterfall, Malativas, Maduao, Consolacion ug Kiotoy sa Panabo City ilawom sa Geographically Isolated Depressed Areas (GIDAs).

Matod ni Gobernador Edwin I. Jubahib (Kuya Gob) nga gituyo gayod paghatod ang pangunang mga serbisyo pinaagi sa programang Oplan Tapok sa Barangay Alang sa Nanginahanglan ug Galisod (Oplan TABANG) ingong pagtuman sa mando ni Presidente Rodrigo Roa Duterte pinaagi sa DILG.

“Gituyo nato ni pinaagi sa mando sa atong Presidente Rodrigo Roa Duterte ug sa DILG nga himoon nato tungod kay daghan sa atong mga kaigsoonan nga adunay problema sa panglawas nga dili dayon moadto sa atong tambalanan kay unang rason “makaya lang.” Para ato nang makontrol, ania ta karon kauban atong mga doctors, nurses para ma-check-up dayon. Dili na kinahanglan moadto pa sa hospital kundili ang serbisyo sa gobyerno mao na’y nianhi sa inyong tugkaran para kamo matambalan o ma-eksamin,” matod ni Kuya Gob.

Gawas sa serbisyong panglawas, bitbit sab sa probinsyal nga panggamhanan ang daghang serbisyong pang-agrikultura, pang-kahayopan, legal, sosyal, imprastruktura, konsultasyon panggamhanan, pangandam-kalamidad, paugnat sa kusog ug batan-ong pang-kalamboan, edukasyon sa kalikopan (environment) ug kalinaw, mga pagbansay alang sa panginabuhian gawas pa sa mga serbisyo gikan sa nasyonal nga mga ahensya sa LTO, Philhealth, TESDA, SSS, PNP, AFP, BFP ingon man Jaycees International nga miduyog sa Oplang TABANG.

“Synchronized ni nga serbisyo. Halos ang inyong panginahanglan dala na namo,” dugang pasabot ni Kuya Gob nga nagpahibalo nga tuig 2020 hiusang i-implementar gikan sa opisina sa mga kongresman sa Davao del Norte, probinsya, syudad ug munisipyo alang sa pag-semento sa mga karsada padulong sa hilit nga mga barangay gawas pa sa nagpadayon nga Oplan Canal diha sa mga bahaonon nga mga LGUs.

“Makita ninyo nga ang theme nato sa Davao del Norte is “One Team, One DavNor, One DavNor, One Team.” Ang atong serbisyo karon sa katawhan kamo ang gihatagan ug priority. Ngano man? Kamo ang among mga boss, kami ang inyong public servants gikan sa mga empleyado sa Kapitolyo, syudad sa Panabo ug tanang elected opisyal, kami ang inyong public servants ug kamo ang among serbisyohan,” pahayag ni Gob Edwin nganong serbisyohan gyod ang publiko.

Mitambong gayod ang mga kapitanes sa Malativas Lilybeth Aldit, Manolito Alcover sa Maduao, Pablito Tucmo sa Consolacion, Mario Pantuñal sa Kiotoy ug Rico Quinoñes sa Brgy. Waterfall. Presente sab si Panabo City Mayor Jose Relampagos, DILG Provincial Director Abito Bernasor, 2nd district Board Members Jannete Tanong-Mabuloc, Engr. Franklin Gentiles, Roy Catalan ug Dr. Daniel Lu, APDO PLt Col. Julius Borja, 1003rd Brigade Commander Col. Mempin, provincial department heads ug kanhi vice-governor Victorio Suaybaguio, Jr nga karon Executive Assistant ni Gob Edwin Jubahib.

 

 

DavNor News