NANAWAGAN ang Davao Regional Medical Center (DRMC) ug ang probinsyal nga panggamhanan sa Davao del Norte pinaagi sa Provincial Health Office (PHO) nga magpa-bakuna ilabina ang mga kabataan aron malikayan ang sakit nga tipdas (measles) atol sa Kapihan sa Kapitolyo, Huwebes, Pebrero 14.
Bisan kung ubos ang gidaghanon sa nahimong biktima sa tipdas karong tuiga kumparar sa miaging tuig, gipalanog ni Dr. Mitzie Lou Osabel, Infection Control Head sa DRMC ang pagbantay sanglit dunay isa nga namatay tungod kay grabe na nga gidala sa ospital.
“Sa atoang surveillance, mas taas man gani ang sa last year, kining awareness maoy nakatabang. Pero di ta mag-kumpyansa kay naa pa man gyo’y measles. . . Dili siya alarming pero mag-igmat gyod ta, be watchful. Last year walay namatay pero karon man gud, week six naay isa kay nag-abot sa Medical Regional Center grabe na,” pahimangno ni Dr. Osabel.
Midugang ang Head sa infection control sa DRMC nga mag-amping nga dili pod makatakod sa uban sanglit bisan sa pag-hatsing mapasa dayon ang tipdas kun measles.
“Dali ra gyod siya makatakod kay droplet lang, dali ra. Ang atong mga estudyante kung naay kalentura ayaw lang sa pa-eskuylaha kay tingali’g mga classmate uban matakdan. .Kung mag-ubo tabon gyod. Kung wala ka’y panyo, dire sa siko. Pananglitan naa ka sa public places, tabon gyod kung mag-hatsing o mo-ubo,” padayong pahimangno sa infection control head sa DRMC.
Ang DavNor Provincial Health Office (PHO) nakatala ug halos 20 na ka kaso sa tipdas.
“Sa Davao del Norte ang pinakataas ang Panabo City, naa sila’y pito ka kaso, next ang Tagum City naay lima, ang Island Garden City naay lima, Asuncion naay isa,” pagbutyag ni Ms. Feah Ferido, Midwife IV sa DavNor PHO.
Hugot gituohan sa administrasyon ni Gobernador Anthony del Rosario nga “ang panagang mas maayo kay sa pagtambal,” pirme gayod gipasiugda sa usa ka tuig na nga paglibot sa Festival of Services (FoS) caravan ang Health Awareness Campaign matag Myerkules ilabina nga ang tipdas ug flu maoy “uso-uso nga sakit.”
“Giapil namo ni siya sa Advocacy awareness every Wednesday ug naga-plano mi nga during caravan especially schedule sa consultation kay naay daghang bata, mag-conduct na pod mi ug mass immunization,” pahayag ni Ms. Ferido.
Aron gyod mamenosan, gi-awhag sa mga awtoridad sa panglawas nga pabakunahan gyod ang ilang mga anak sanglit kini maoy libre.
“Again, gi-encourage nako ang mga inahan nga pa-bakunahan gyod nato ang atong mga anak. Ayaw mo kahadlok kay safe siya, para ma-prevent nato ang komplikasyon. Tapos karon kay panahon man pod sa baha-baha, ulan, kung naa ma’y gisalod nga rain water takloban para malikayan ang dengue ug leptospirosis,” pag-awhag ni Dr. Osabel sa publiko nga dili lang tipdas nga sakit ang likayan apan ang tanang sakit kutob sa mahimo.
