2,104 naserbisyohan sa Madaum FoS

BISAN kung duha lang ka adlaw, miabot ug sobra duha ka libo ang nakadawat sa lain-laing serbisyo hatod sa Festival of Services (FoS) caravan didto sa barangay Madaum, Tagum City, Enero 28 ug 29, 2019.

Gawas sa serbisyo medikal, legal, panglawas ug sosyal nga pag-atiman, ang FoS caravan padayon sab nga nagtudlo ilabina sa mga kabatan-onan nga motabang pag-atiman sa kinaiyahan pinaagi sa Provincial Environment Office (PENRO).

Sa ikaduhang adlaw gahapon, Enero 29, napulo ka mga bata ang mihayag sa ilang tinguha pag-atiman sa kinaiyahan pinaagi sa pag-drowing nga may tema: “Clean and Green.”

Ang 14-anyos nga si Maimonah Pongo, Grade 9 sa Jose Tuazon National High School mipahayag sa iyang mahimong papel diha sa ilang purok.

“Sa mga project sa purok pwede mi maka-limpyo or maka-segregate ng mga basura,” mubong komento ni Maimonah nga nagpakita sa iyang gi-drowing.

Ang laing Grade 9 sa pareho nga eskuylahan Johaira Janjali mipahayag sab sa iyang mahimo diha mismo sa ilang tunghaan.

“Manglimpyo ug basura, ilabay sa basurahan sa tama jud, tapos manglimpyo pod sa room,” matod ni Jamilah.

Samtang ang Grade 7 nga si Jamilah Pongo nagpahayag sab sa iyang mahimo diha mismo sa ilang balay.

“Magtabang sa Mama, manghinlo. Ilabay sa basurahan sa malata, sa ma-recycle” pahayag sab ni Jamilah nga nagtug-an nga dili siya magkalat-kalat.   

Sa mga FoS sa Visayan Village ug dinhi sa Madaum, giapil na sa sobra otsenta lain-laing serbisyo ang libreng manicure, pedicure ug body massage nga gikalipay dili lang sa mga naserbisyohan apil na sa mga nag-massage tungod sa “honorarium.” Hinuon, ilabinang gipasalamatan ang serbisyo panglawas.

“Si AGR. . .maayo kay makatabang. . magpasalamat ko ni RGR kay makatabang sa katawhan, unya ang mga tawong naay gibati makasulbad,” pahayag-pasalamat ni Mira, 51 anyos sa Purok 1C, Madaum ug sakop sa tribong Kagan (Muslim) nga nagbitbit sa tambal ug mga bitamina uban sa iyang 11-anyos nga anak.    

Kini na ang ika-napulo’g walo ka FoS caravan ni Gobernador Anthony del Rosario gikan niadtong Pebrero 2018 dala ang mga serbisyo gikan sa tanang departamento sa Davao del Norte Kapitolyo kauban ang pipila ka mga nasyonal ahensya.


 

More Davnor Updates at

DavNor Karon

 

DavNor News