NADUGANGAN na sab ug usa ka gatos kasiyaman ug tulo (193) live-in nga kaminyoon ang gihimong legal sa Kasalan ng Bayan dala sa BEST PEOPLE Festival of Services (FoS) ni Gobernador Anthony del Rosario, Huwebes, Nobyembre 8.
“Mao ni ang usa sa mga programa nato sa probinsya. Ginaapil nato ni sa Festival of Services para maka-minyo gyod ang tanan nga nagapuyo pero illegal ang pagpuyo kay wa pa man magminyo. Mao na ang tuyo nato sa atong probinsya. Kadtong mga magtiayon nga wa pa magminyo ato gyod himoon nga legal na sila nga couples, married couples. Mao na ang rason nga ginahimo nato ni,” pagklaro ni Gobernador Anthony del Rosario kun AGR sa usa sa katuyoan sa Serbisyo Caravan.
Gawas sa pagkahimong legal, libre pa gyod ang mga gigamit sa mga magtiayon nga sinina, dunay mga regalo, wine, cake lakip na ang haplas nga produkto sa pag-training atol sa Serbisyo Caravan.
“Libre na ni, wala na mo’y bayronon para wa na mo’y rason dili pa mo magminyo. Mao ni atong ginabuhat kay importante sa atong probinsya nga lig-on ang pundasyon sa atoang matag pamilya. Kay kung lig-on ang pundasyon sa pamilya, molig-on pod ang pundasyon dinhi sa Davao del Norte,” dugang pagklaro sa gobernador.
Ang bise-mayor sa Asuncion Jeng Camillo nagpaambit sab sa ilang personal nga eksperyensya labot sa pagdumala sa panalapi sa panimalay.
“Gusto nakong i-share ang pag-handle sa finances sa amoang pamilya. Timan-i mga asawa. Ang susi sa paghupot ug kwarta sulod sa pamilya 70, 20, 10. Kung ang inyong kinitaan usa ka gatos pesos, ang inyo lang gastohon 70 pesos, inyo nang inot-inoton mga asawa. Ang 20 niini mao kana’y savings ninyo para naa mo’y makuot kada adlaw. Ang 10 porsyento mao kana ang para sa atong ginoo. Para di malubong sa utang ang matag pamilya, mao kana’y sumbanan. Mao kana’y timan-i, 70, 20, 10,” matod ni bise-mayor Camillo.
Apil sa 193 ka magtiayon ang 71-anyos nga si Restituto Superales ug ang 45-anyos nga si Lorna Lagahit nga mapasalamaton kaayo sa Kasalan ng Bayan dala ni Gob AGR.
“Nagpasalamat pod mi nga ing-ani kay tungod sa among kawad-on. Nag-agni man si gobernador nga magkasalan nga libre, na-excited pod mi magpakasal. . Ang purpose lang namo nga mahatagan ug bendisyon,” pasalamat ni Lorna ug Restituto kang Gob del Rosario.
Apil sab sa 193 ka paresan nga gikasal ang 19 anyos nga si Rowena Oyanon ngadto kang Alberto Alcomendras nga 54 anyos nga pulos nagtuo nga ang kaminyoon maoy “forever.”
Sa paglibot sa New Corella, Braulio E. Dujali, Asuncion, Panabo, Carmen, Talaingod, Kapalong, Sto. Tomas ug Island Garden City of Samal miabot na ug 946 mansibado o ipon-ipon nga kaminyoon ang nahimong legal sa Kasalan ng Bayan dala sa BEST PEOPLE Festival of Services.
