KAY GUSTONG himoong legal ang ilang panagtipon, way duhaduha nga miapil ang usa ka 80-anyos nga bana uban sa iyang 60-anyos nga asawa sa libreng Kasalan ng Bayan sa Talicud Island, Huwebes, Septyembre 13, 2018.

“Kining inyong pagkasal wala mo’y ibayad kay serbisyo ni gikan sa Provincial Capitol sa probinsya sa Davao del Norte,” matod ni Gobernador Anthony del Rosario (AGR).

Si Eulogio nga byudo nakig-ipon na kang Nida Dayangco, 60-anyos, sulod na sa 16 ka tuig ug usa sa 55 ka paresan sa libreng kasalan sa isla. Espesyal kaayo alang kang Eulogio sanglit ang ilang kasal naatol sa iyang ika-80 nga kasumaran sa adlaw’ng natawhan.

“Wa ko magdahom nga natunong sa birthday, September 13, 1938,” matod ni Eulogio nga nakadawat ug regalong “cash” gikan kang Gob AGR, Senior Board Member Rodney del Rosario, BM Raymund Millan ug provincial administrator Samson Sanchez gawas pa sa daghang regalo.

Pinaagi sa BEST PEOPLE development agenda sa gobernador, gusto niini nga dalhon paduol ang mga serbisyo nga libre ngadto sa tanang Dabaonon nga nagpuyo sa Davao del Norte ilabina niadtong naa sa lagyong dapit lakip na ang paghimong legal sa nag-ipon-ipon nga mga magtiayon.

Gawas sa gipaduol pangunang serbisyo sa DavNor Kapitolyo, gipahibalo sab sa gobernador nga ang mga “Malasakit Center” nagserbisyo na sa tuyo nga walay bayaran ang mga pasyente diha sa hospital sa gobyerno. Ang Rehiyon XI diin naapil ang Davao del Norte maoy pinakaunang rehiyon sa Pilipinas nga adunay mga centers alang sa “zero billing.”    

“September 5 nagsugod ang atong “Malasakit Center” dinhi sa Samal District Hospital. Tungod sa atong pakig-estorya kang Mayor Sarah ug Presidente Digong, ang tanang hospital sa Davao del Norte nga gobyerno apil na ang Samal District Hospital, zero billing na karon. Kung kinahanglan mo mag-patambal, magpa-check-up, magpa-laboratory, tanan libre na. Kung dili mo kabayad, moadto lang mo sa Malasakit Center. Ang tuyo nato diha para himoon nga “zero billing,” pahibalo sa gobernador nga gikalipay pag-ayo sa taga Talicud ilabina sa mga senior citizens lakip kang Eulogio ug Nida.

Sa matag hatod sa Serbisyo Caravan gihatagan gayod ug linain nga pag-atiman ang mga senior citizens pinaagi ug paggahin ug adlaw alang kanila.

Gawas sa mga serbisyo, ang Local Government Units sa barangays Sta Cruz, Dadatan, Cogon ug Linusotan sa Talicud island pulos nakadawat ug tagsa ka mga generator set dala sa BEST PEOPLE caravan of services ni Gobernador AGR.

DavNor News