WALA gyod talikdi hinuon gihatagan ug linain nga pag-atiman ang mga senior citizens sa mga barangays Sta Cruz, Dadatan, Cogon ug Linusotan Talicud island sa ikatulong adlaw sa BEST PEOPLE caravan of services nga dala sa administrasyon ni Gobernador Anthony del Rosario (AGR).
Kahinumduman nga atol gayod sa pagbukas sa caravan of services niadtong Septyembre 10, mismong si Gobernador AGR ang nagpasabot sa katuyoan kung nganong gidala sa pinakalayo ug hilit nga lugar sa probinsya ang mga serbisyo.
“Lisod kaayo kung kamo pa moadto sa Tagum kay dako kaayo’g gasto sa pamilite. Mao nang rason ang atong kagamhanan sa probinsya, kaming tanan, nagdesisyon nga maghimo ug ing-aning programa para ang mga tao nga nagpuyo sa layo nga lugar di na kinahanglan pa mag-adto sa Tagum kay sayang ang kwarta. Mas maayo pa kami ang moadto sa inyoha para dad-on namo ang tanang serbisyo para dili na mo maglisod. Mao na ang tuyo sa BEST PEOPLE Festival of Services,” matod sa Gobernador.
Ang Person With Disability nga 64 anyos Ms. Erlinda Fabroces taga Sta. Cruz, Talicud mapasalamaton kaayo nga gipaduol ang mga serbisyo.
“Nagpasalamat ko nga gi-daa dire kay di nako kaadto, wa man ta’y ikaplete, wa man ta’y kwarta. Maayo dinhi kay baktas-baktason ra. . Tabok-tabok Kaputian di na ko kasakay-sakay, hibawo sa akoang lisod kaayo. Mapasalamaton gyod ko,” matod nga usa ka Person With Disability.
Ang 86-anyos byuda nga si Rufina Alegro mapailobon nga naghulat nga matawag iyang ngalan aron makadawat ug mga tambal ug pag-atiman.
“Mianhi ko dire kay kining tigulang ta daghan pamation, unya akong mata, gusto ko kadawat ko’g tambal. . Nagpasalamat ko’g dako nga gimugna ning programaha kay makatabang sa mga kabos ingon namo tawon nga wa mi ikapamasahi, gasto sa doctor, nga matabangan mi maayo among panglawas,” matod ni Rufina.
Giisip sab ni Eulogio Cisneros, 80 anyos ingong dakong tabang ang serbisyo caravan.
“Daghan kaayong salamat sa nagpasiugda niining programaha kay nakatabang gyo’g dako namong mga pobre. Daghan salamat gyod ning inyong pag-ari dire. Kay kung wala pa mo di mi makalihok sa among ginagmay’ng sakit,” matod ni Eulogio.
Ang DavNor Provincial Health Office (PHO) maoy nanguna paghatag sa mga serbisyo medical alang sa mga tigulang kauban ang mga personahe sa PEEDO, Department of Health ug sa Davao Regional Medical Center (DRMC) sa Tagum City.
Ang letrang “O” sa BEST PEOPLE development agenda ni Gob AGR nagkahulogan ug “Optimum Health” nga serbisyo alang sa tanang Dabaonon nga nagpuyo sa probinsya ilabina niadtong naa sa lagyong dapit.
