BISAN kung gitugot sa ilang kultura ang pagbaton ug daghang asawa, desidido ang daghang mga Lumad nga sakop sa Ata-Manobo nga tribo nga usa na lang ug ila gyod unongan ang iyang asawa nga gipakaslan.

Atubangan sa iyang kapikas, kini ang gibutyag ni Billy Talandang nga nagtipon na sulod sa walo ka tuig uban ni Lisa ug dunay tulo ka anak.

“Dili na gyod. Sineryos gyod ning akoa nga pakaslan siya,” saad ni Billy ngadto kang Liza nga dili na siya mangita ug lain.  

Si Reche Bato Katipay nga sobra tuig nga nakig-ipon kang Rea Mean Doling ug dunay usa ka anak desidido na pod nga wala na siya’y lain ug gikalipay pag-ayo ang libreng kasalan.   

“Kini okasyon na gikan sa atong halangdong Gobernador nga si AGR. Salamat pod mi sa iyaha nga gihatag ni niya nga programa para pod nga sa among tribo pait pod, mas okey ni kay naka-save pod mi. . Wala na juy lain,” pagsaad ni Reche atubangan sa iyang asawa.

Niadtong Hulyo 20, si Talaingod Mayor Basilio Libayao ang legal nga nagkasal sa 62 ka paresan nga pulos may mga anak na.

“Palihug atong tubagon ang mga pangutana sa kaminyoon. . Ania ba kamo karon aron sa pagpalig-on alang sa walay kataposan nga kasabotan?” pangutana ni Mayor Libayao sa mga bana ug asawa gitubag ug “oo.”

Giisip na sab sa mga Lumad nga importante gyod ang legal nga kasal.

“Importante man gud kay kung naay mga requirements, unya dugay na pod mi nag-ipon. Nagkahigugmaay na.” “Amo pod na kinahanglan kay syempre mo-graduate among anak mangita man gyod na’g marriage contract sa ginikanan. Mao pod na among gikinahanglan nga magpakasal gyod mi,” pahayag ni Billy ug Liza nganong gi-legal nila ang pag-ipon-ipon.

Sa pinulongan nga Ata-Manobo, nagpasalamat si Billy ug Liza sa libreng Kasalan ng Bayan nga gidala sa BEST PEOPLE Festival of Services ni Gobernador Anthony del Rosario didto sa Sto. Niño, Talaingod. 

Sa matag Serbisyo Caravan, ang libreng Kasalan ng Bayan ang pinaka eksayting ug pinaka sadya nga magtiklop sa usa ka semana serbisyo publiko.

“Kung kamo wa pa nagminyo, ang problema gud kining inyohang mga anak ug kining inyohang mga partners kay dili sila makadawat ug mga benepisyo. Pananglitan ang lalaki matagaan ug Philhealth. Kung dili mo nagminyo dili ka legal nga asawa, kung dili ka legal nga asawa dili pod ka maka-avail sa Philhealth ug syempre ang imong mga anak dili pod legal syempre dili pod makabenepisyo sa gobyerno, bisan kadtong mga 4Ps maglisod pod. Maong rason namo nga gusto namo, kung gusto pod mo, nga dapat i-legalize na gyod. Ug mao na ang atong tuyo,” matod ni Gob AGR sa iyang mensahe.

Ang Serbisyo Caravan nakalibot na sa New Corella, Braulio E. Dujali, Asuncion, Panabo, ug Carmen.