PAKUSGON sa BEST PEOPLE Public Service Caravan ang kampanya sa probinsyal nga panggamhanan nga padaghanon ang gulay ilawom sa programang Ang Gulayan Revolution kun AGR.’
Kini ang naobserbahan ni Provincial Agriculture Office (PAGRO) Assistant Department Head Engr. Daryl Ayado sa “halinon” kaayo nga mga semilya sa gulayon atol sa public service caravan didto sa Carmen, Davao del Norte sa miaging semana.
“Naobserbahan nako kining mga household, demand kaayo ang mga gulay. Magdala mi ug tag 150 ka pakete kada adlaw good for 150 ka household, kulangon. Nagpasalamat pod mi ato man nang gi-promote Ang Gulayan Revolution, ang atong AGR, nga unta matudloan kining mga eskuyulahan, kabaranggayan, komunidad ug mga balay nga maghimo ug kaugalingong garden para sa nagkalain-laing gulay. Nakita nato ang interes sa mga tao. Kulang lang gyod seguro ang panghatag ug mga semilya para motanom sila ug gulay,” pahayag sa PAGRO Asst department head atol sa ikaupat nga serbisyo caravan sa Carmen.
Dugang gibutyag ni Engr. Ayado nga aron dili masayang ang libreng gipanghatag nga semilya, adunay mga personahe sa PAGRO nga mag-monitor.
“Sa atong vegetable production sa AGR, gamonitor mga kaubanan nato mga school gardens, communal gardens, mga backyard, ato ni silang subayon, sayang man gud, gwapo ra ba nga mga semilya,” dugang pasabot ni Engr Ayado nga hangtod niadtong Huwebes (Hunyo 14) adunay 600 na ka pakete ang ilang nahatag.
Gikalipay gayod sa mag-bilas nga Cresilda ug Carmelita Garavelis ang ilang nadawat libreng semilya.
“Nindot kaayo, daghan sila’g gipanghatag mga gulay, mga prutas. Dakong tabang ni sa amoang mag-uuma. May na lang ni naa ta’y maani unya, hulaton naay pangbaligya, naa pod mi hulat-hulaton pangbaon sa bata unya,” matod ni Cresilda Garaviles nga taga Purok 18A, Ising, Carmen.
“Lansones, semilya sa talong, upo. . Kanindot ani naay manghatag ug semilya. . Sa amoa nga mga pobre dako kaayo ni nga tabang. Daghang salamat sa naghatag ani nga mga serbisyo,” pasalamat ni Carmelita sa paghatod sa BEST PEOPLE Public Service Caravan sa ilang lungsod.
Gawas sa pagpapanghatag ug semilya sa gulayon duna sab mga seedlings sa lansones, cacao ug ubang prutas ang gihatag sa PAGRO gawas pa technical assistance nga deretsong gipaabot ngadto sa mga mag-uuma.
Ingong agrikultural nga probinsya, katuyoan gayod sa administrasyon ni Gobernador Anthony del Rosario nga mapataas ang produksyon sa bisan unsang tanom nga gipalambo sa mga Dabaonon nga makatabang sa food security sa Davao del Norte.
