MAHINAMON nga gisugat sa taga Carmen, Davao del Norte ang pag-abot sa BEST PEOPLE Festival Caravan of Public Services, Lunes, Hunyo 11 nga gipahigayon diha sa Carmen National High School.
“Our gratitude to the provincial government of Davao del Norte through Governor Anthony del Rosario for bringing the services here. Usa kini ka oportunidad alang kanamong taga Carmen nga makatagamtam sa mga serbisyo nga may kalidad gikan sa atong probinsya. Liipaaay kaayo mi. Pinasahe ni siya because there are services here offered that are not offered sa usual Clinica sa Purok. We are so proud and we are so happy to have this activity,” malipayong pag-abi-abi ni Carmen Mayor Virginia Perandos kauban ang mga konsehales ug opisyales sa maong lungsod sa serbisyo publiko nga gipaabot hangtod Byernes, Hunyo 15.
Ang lungsod sa Carmen maoy ika-5 nga gihatdan sa BEST PEOPLE Festival Caravan of Public Services nga gisugdan didto sa Limbaan, New Corella, Braulio E. Dujali, Concepcion, Asuncion ug Panabo City. Tumong niini tag-5 ka mga barangays sa matag lungsod ang serbisyohan apan wala hinuon gilimitahan ang bisan kinsa nga nagpuyo sa maong lungsod nga mopahimulos sa mga serbisyo. Sa sunod hugna nga paglibot, lima na sab ka barangays ang hatdan.
“Atong paga pistahan ang halos usa ka gatos ka serbisyo nga regular nga ginahatag sa atong Kapitolyo ug sa national government agencies, municipal government ug barangay government. Tungod sa kalayo ug tungod sa mga requirements, gipili na lang sa uban nga dili mo-avail sa serbisyo. Apan karon, dire mismo sa inyong lugar, dire mismo sa Carmen gipaduol namo ang serbisyo ug kining tanan libre.. Kining Festival of Services usa usab kini ka maayong pamaagi aron mismo makadungog sa inyong mga kinahanglanon, unsa man gyod ang tama nga mga proyekto, mga programa nga makatubag sa inyong panginahanglan,” pahayag ni DavNor Administrador Samson Sanchez sa mensahe ni Gobernador Anthony del Rosario.
Ang tanan regular nga mga serbisyo sa DavNor Kapitolyo uban sa mga nasyonal nga ahensya sa AFP, PNP, Provincial Prosecutors Office, TESDA, PAO, LTO, DSWD, DFA, PSA, COMELEC, DENR, DA, DRMC ug DOH kauban ang local ug barangay nga mga service providers naghiusa aron ipaabot ang lain-lain 100 ka matang sa serbisyo ilabina ang labot sa serbisyo panglawas.
Matod sa 71-anyos byuda nga si Evelyn Luis, taga Purok 18-A nga mianha siya sa Caravan of Services aron magpa-check-up ug makadawat ug tabang gikan sa gobyerno.
“Tabang sa gobyerno kay wala naman nagbuhi nako, wa naman ko’y bana,” mubong pahayag ni Nanay Evelyn nga usa lang sa taas nga linya sa mga tawo nga gustong modawat ug serbisyo panglawas.
Susama sa 4 ka lungsod nga nahatdan na ug public services sa BEST PEOPLE Caravan, ang departamento sa Provincial Health Office kauban ang DOH, MHO ug RHU mao ang pangunang tumong sa mga tawo.
