HILABIHAN kasadya ang ikalimang adlaw sa BEST PEOPLE Serbisyo Caravan niadtong Byernes, Abril 27, dihang gihimong legal ang panagtipon sa 45 ka magtiayon pinaagi sa libreng Kasalan ng Bayan didto sa Barangay Gym, Concepcion, Asuncion, Davao del Norte.
Sama sa nahitabo nga Serbsiyo Caravan sa Limbaan, New Corella ug Braulio E. Dujali, si Davao del Norte Gobernador Anthony del Rosario ang principal nga ninong kauban ang mga department heads sa DavNor Kapitolyo ug mga opisyales sa lungsod.
“Ang akong mensahe karong adlawa morag reminders lang gyod ni. Ang primero nakong reminder: ang kaminyoon dili sayon, lisod gyod. . Kay lahi man gyod kamong duha. Ang lalaki midako sa iyahang pamilya, ang babaye midako sab sa iyang pamilya. . Ang challenge kung unsaon ang paghimo sa usa ka pamilya nga way gubot. That’s why importante gyod ang understanding, communication importante pod na,” matod ni Gobernador Anthony ngadto sa 45 ka magtiayon.
Giklaro sa gobernador nga paningkamotan gyod nga dili magbulag kay mga bata ang mahimong biktima ug makaluluoy.
“Paningkamotan gyod ninyo nga dili mo magbulag. Kay kung magbulag mo, luoy kaayo ang mga bata. Sa mga broken families problema gyod diha mga bata. . mga biktima gyod sila. . Paningkamotan gyod tanang mga lakang nga dili gyod mo magbulag, importante gyod na,” pahamangno ni Gob AGR nga nagklaro nga bisan si Presidente Rodrigo Duterte dili uyon sa gisang-at nga balaod-non nga himoong legal ang diborsyo sa Pilipinas.
Apan pananglit wa na gyod laing solusyon kundili ang panagbulag lang, mihangyo si Gob AGR nga dili pasagdan ang kabataan.
Si Daniel Cabuglason ug Alma Cañar midesisyon nga himoong legal ang ilang lima ka tuig nga pagtipon aron mahingpit nga bana ug asawa nga “wa na’y bawiay,” hinuon “hugtananay na sa bakos”.
“Nindot, kay kung walay kasal way grasya sa ginoo. . Mga tiguwang na man gud kinahanglan gyod atong pamuyo nga naa gyoy bendisyon. . Wa na gyoy bawiay, ug hugtanay na gyod sa bakos,” matod sa 64-anyos nga si Daniel ug 66-anyos nga si Alma.
Ang 25-anyos nga si Romar Panimbaan ug 26-anyos Jezebel Domingo may duha na ka anak ug midesider sab nga himoong legal ang ilang panagtipon sulod na sa lima ka tuig.
“First pa lang wala ko nagmahay nga nag-ipon mi, so gi-dive nako ni nga opportunity aron mahimong legal. . Syempre love man nako siya,” matod ni Romar ug Jezebel.
Dili lang ang bayronon sa pagrehistro sa kasal ang libre apan lakip na niini ang gisul-ob sa mga misis ug mister. Ang tanan nakadawat ug cake ingon man regalo ug libreng souvenir photo gikan kang Gob AGR gawas pa sa mga regalo nga gihatag sab sa mga ninong nga department heads.
Ilawom sa BEST PEOPLE development agenda sa administrasyong Anthony del Rosario, katuyoan niini nga ipaduol ang mga serbisyo aron man lang makadaginot sa kwarta ug panahon ang mga Dabaonon. Tumong usab niini nga bug-os mapahimuslan ang angay’ng benepisyo gumikan sa legal nga kahimtang sa pamilya ilabina ang mga anak diha sa edukasyon ug sosyal nga mga serbisyo.
