SA IKAUPAT ka adlaw, Abril 26, padayon nga gidala sa BEST PEOPLE Caravan ang daghang klase sa serbisyo lakip na ang ‘Handog Titulo’ ngadto sa 21 ka mga tag-iya ug yuta sa Asuncion.
Tungod sa kakulangan sa kwarta, nadugay ug kuha sa mga tag-iya ang titulo sanglit aduna pa sab kini bayronon diha sa Register of Deeds.
“Nadugay-dugay kay wa pa ma’y kwarta gud, kanang gitawag nato nga maapekhan pod ta ba. Tungod sa Handog Titulo dako gyod kaayo ug pasalamat nga gihimo ni governor nga gihatag ug tagsa-tagsa ang titulo sa among paningkamot,” matod ni Mr. Evaristo Anigan nga taga Purok 1, Sagayen, Asuncion, Davao del Norte.
Matod ni Atty John Paul Devilleres, Registry of Deeds III sa Davao del Norte Office nga ang Titulo sa yuta mao ang pamatuod sa pagpanag-iya niini ug aduna kini registration fee nga 2,000 pesos nga gihimong libre tungod sa Handog Titulo nga programa sa probinsya.
“Ang kumpleto nga kamatuoran nga ikaw tag-iya sa yuta, ang titulo nga narehistro sa opisina sa Register of Deeds. . Kamong modawatay ron, kamo na gyod ang tag-iya sa yuta. Dili na na maangkon pa ug lain. . . Supposed to be naa mo’y dos mil nga bayranan nga registration fee pagkuha ani. Unya kay Handog Titulo man ni ron, libre na,” matod ni Atty. Devilleres nga nanguna sa pag-apod-apod sa 21 ka titulo ngadto sa mga tag-iya.
Usa sab si Mrs. Asuncion Agoho nga taga New Loon, Asuncion nga nakadawat sa titulo sa yuta nga iyang nasunod sa iyang ginikanan.
“Sinunod sa katigulangan. . Medyo nadugay kay. . aguy nagtanga man. . Salamat kay napasayon sa pag-withdraw sa titulo nga menos gastos gyod,” matod sa mapahiyomon nga Mrs. Agoho.
Si Mrs. Ailen emosyonal nga midawat ug mapasalamaton kaayo nga nagunitan na gyod niya ang titulo sa yuta nga gihatag sa iyang Lolo.
“Dako gyod kaayo akong pasalamat nga usa ko ka beneficiary sa Handog Titulo karon ug kulba pa jud kaayo akong dughan. . Unang-una nagpasalamat jud ko sa atong Labaw’ng Makagagahum. Ikaduha, nagpasalamat jud ko sa akong Lolo nga naghatag ani uban sa iyang mga anak ug sa tanan-tanan. Lipay jud ko ug dako kay apo raman gud ko, gihatag ra man pod ni sa akong Lolo, nagpasalamat pod sa iyang mga anak,” matod ni Ailen nga nakahilak sa kalipay nga nadawat na gyod niya ang titulo sa yuta diha sa iyang ngalan.
Sa ilang pagkadawat sa titulo, giawhag ni PASSO department head Engr. Joyce Gualberto nga ipakita ang pagkamapasalamaton pinaagi sa pagbayad sab sa ilang mehorasan.
“Unsay feeling ninyo? Success!! Dugay na man ninyo, pila ka tuig gihandom-handom, wala lang ninyo nakuha kay naa pa’y kakulangan, naa pa’y bayronon. Pasalamat ta nga naapil gyod kini sa atong Festival of Services gikan sa atong probinsya nga gipangunahan sa atong Gobernador Anthony del Rosario. . Maayo sab nga matag tuig maghandom ta sa mehorasan kay kanang buhisan, mao na ang dugo nga naglatay sa atong panudlanan,” matod ni Provincial Assessors’ Office department head Engr. Joyce Gualberto.
Ang BEST PEOPLE Festival of Services maoy lima ka adlaw nga paghatod sa usa ka gatos nga serbisyo gikan sa tanang departamento sa DavNor Kapitolyo kauban ang nasyonal nga mga ahensya sa Registr of Deeds, AFP, PNP, Provincial Prosecutors Office, TESDA, PAO, LTO, DSWD, DFA, PSA, COMELEC, DENR, DA, DRMC ug DOH.
