KANUNAY ug nag-unang gidugok ang gitapo nga mga serbisyo ug libreng mga tambal dala sa Provincial Health Office, Department of Health ug Municipal Health Office hatod sa BEST PEOPLE Festival of Services.
Gikan pa sa New Corella, Braulio E. Dujali ug hangtod sa Asuncion, liboan ang naglinya alang sa lain-laing serbisyo sa panglawas nga naglakip sa medical check-up, dental, pre-natal ug post-natal, minor surgeries, family planning counselling ug daghan pang uban. Mas nga midaghan ang nag-avail sa health services didto sa Concepcion, Asuncion tungod sa libreng tuli alang sa mga batang lalaki.
Si Alex, Madelyn maoy pipila sa liboan ka mga residente nga mi-avail sa daghang serbisyo ug nakadawat ug libreng tambal ug bitamina.
“Nagkuha’g tambal. . Nagkuan mi sa livelihood, 4Ps,” matod ni Alex nga taga Purok 16 barangay Sagayen nga maoy naghawid sa bata samtang ang iyang misis nagkuha ug tambal.
“Wala pa ko’y Philhealth, . . sa 4Ps gusto ko magpa-miembro. . mamili pa pod ko,” matod ni Madelyn nga taga Purok 8 barangay Napungas nga nagproseso alang sa Philhealth ug 4Ps gawas pa sa ubang serbisyo.
Si Mr. Obinque gikuyogan gyod ang iyang 9-anyos nga anak aron matuli.
“Gipatuli nako na aron makuha na iyang kulba kay ug dugay-dugayon sige man siya kulbaan,” matod ni Mr. Obinque nga taga Purok 12 barangay Sagayen.
Ang batang si Rico, 7-anyos ug Daniel, 11-anyos maoy apil sab sa 120 ka mga bata nga gituli ug gihatagan pa gyod ug mga tambal.
“Pisot pa man, pisot pa man,” matod sa 7-anyos nga si Rico nga estudyante sa Concepcion Elementary School ug andam na pod magpatuli samtang bakasyon pa.
“Para naa po’y uyab,” mipahiyom si Daniel samtang gipangutana kung nganong magpatuli siya.
Sa pagsugod pa lang sa BEST PEOPLE Festival of Services, balik-balik nga gipasiugda ni Gobernador Anthony del Rosario nga sanglit dili ilang kwarta ang gigamit sa programa ug mga serbisyo angay lamang nga ibalik kini ngadto sa katawhan ang ilang gibayad nga buhis.
“Dili namo ni kwarta ang gigamit sa ingon ani nga programa, proyekto ug serbisyo. Hinumdomi dili namo ni kwarta, inyo ning kwarta pinaagi sa inyong pagbayad ug buhis. Ug sakto lang nga ibalik namo ning kwartaha kaninyo pinaagi sa mga maayong programa ug proyekto. . Bisan ang atong Presidente Rodrigo Roa Duterte miingon nga kinahanglan ibalik sa katawhan ang buhis nga ilang gibayad pinaagi sa mga maayong programa ug proyekto. Pahinumdum lang nako sa tanan, ang tinud-anay nga pagserbisyo dili angay ipanghambog, dili pod angay ipang-hadlok,” esplikar ni Gob AGR atol sa BEST PEOPLE Serbisyo Caravan gikan pa sa Limbaan, New Corella ug Poblacion, Braulio E. Dujali.
Ang BEST PEOPLE Festival of Services maoy lima ka adlaw nga paghatod sa halos usa ka gatos nga serbisyo gikan sa tanang departamento sa DavNor Kapitolyo kauban ang nasyonal nga mga ahensya sa AFP, PNP, Provincial Prosecutors Office, TESDA, PAO, LTO, DSWD, DFA, PSA, COMELEC, DENR, DA, DRMC ug DOH.
