MIPAILAWOM ang 50 ka mga miembro sa Barangay Development Council (BDC) sa Sagayen, Napungas, New Loon, Pamacaun ug Concepcion sa lungsod sa Asuncion alang sa usa ka adlaw nga Barangay Development Executive Course Myerkoles, Abril 18.
Ilawom sa letrang “T” sa BEST PEOPLE development agenda, katuyoan sa administrasyon ni Gobernador Anthony G. del Rosario nga mapakusog pa ang kakayahan sa mga barangay opisyales alang sa epektibong paghimo ug plano aron ma-implementar sa husto nga paagi alang sa kalamboan sa barangay.
“Sa atong pag-serve sa barangay, nahimo tang lider. Tapos naa ta’y mga decisions nga gibuhat. Karong hapona i-share nako sa inyoha kung unsa man gyod ang role ninyo as barangay officials and functionaries, unsang influence ninyo over sa inyong community and patterns of decision-making. . Mag-discuss ta kung unsa gyod ning Leadership ug unsa ni siyang Decision-making. . unsa gyod ang deperensya sa Leadership ug Management,” matod ni Dr. Marilou Junsay, Dean sa Davao del Norte State College nga naghisgot sa ikatulong topiko Leadership and Decision-Making.
Bisan kung 2016 pa gi-implementar na sa mga barangay ang Gender and Development, gi-apil gayod kini sa executive course aron matino kung unsa pa ang mga kakulangan ug angay pauswagon.
“Duna na ba gyod resulta ang atong kanunay pag-estorya bahin sa GAD. Atong tukion kining pagka Gender responsive LGU, or “GeRL” ka ba? Nakatubag ka na ba niini? Natubag na ba ninyo ni nga pangutana or karon pa lang,” pasiuna-pangutana ni Ms. Judeza Pingoy, Executive Director sa Davao del Norte Learning Institute (DNLI) ngadto sa mga barangay functionaries alang sa topiko nga Gender and Development.
Gawas sa maong ulohan, gitudloan sab ang mga sakop sa BDC labot sa Philippine Administrative System ni BPA Program Chairperson Mr. Glenne Lagura ug Anti-Red Tape Act (ARTA) ni PHRMO Supervising Administrative Officer Ms. Gale Mortillero.
Kini na ang ikatulong batch alang sa mga barangay functionaries nga gipailawom sa Barangay Development Academy Executive Course nga una nang gipahinabo sa mga lungsod sa New Corella ug Braulio E. Dujali atoll sa BEST PEOPLE Caravan of Services.
