NAUSAB ang kinabuhi sa daghang Dabaonon tungod sa programang Davao del Norte Credit Surety Fund (DNCSF) ug Special Program for Employment of Students (SPES).
Atol sa Convocation Program Lunes, Abril 16 nga gipasiugdahan sa Provincial Administrator’s Office -- Cooperative Investment Division ug Employment Workforce Development Division (EWDD), pipila ka mga indibiduwal nga nagpaambit sa mga kalamposan tungod sa maong programa.
Si Jay Mark I. Sausa nga nahimong SPES grantee sa 2011 hangtod 2014 mapasalamaton gayod nga usa na siya ka maestro sa hayskul karon.
“Dako kaayong kabag-ohan sa akoang pag SPES. Right now, as a teacher na-mold pa akoang sarili to become a better person especially ang social skills kay sa SPES moatubang man gyod ka ug mga tao, mga bosses nimo,” matod sa ni Teacher I Mark Sausa sa Antonio V. Fruto NHS nga mapasalamaton gayod sa programa gikan pa ni former Governor Rodolfo del Rosario hangtod karon nga gipadayon ni Gobernador Anthony del Rosario.
Si Mirasol T. Ampang nga usa ka miembro sa Dibabawon IP community mapasalamaton sab sa Livelihood program sa probinsyal nga panggamhanan labina dihang naagian ug baha ang ilang lugar.
“Ning-abot ang Livelihood program nga beads making. . Nahibalo gyod ko dayon kay intresado gyod ko. . Nakatabang gyod ni’g dako sa amoa. . Pag-abot sa bagyong Vinta ang among balay naabot ug baha so ang amoang beads naapil. Wala ko nawad-an ug paglaom, nagpalit ko, naghimo ko ug otro. . . misamot pa hinuon kay daghan nako ug order,” matod ni Mrs. Ampang diin ang iyang hinimo nga mga beads naka-display sa DavNor Pasalubong Center sulod sa Kapitolyo karon.
Ang kadaghanan sa sobra 1,000 ka miembro sa Kapalong Market Vendors Multi-purpose Cooperative (KAMAVEMCO) nakadawat sab ug mga benepisyo nga daghan nahimong mga tag-iya na ug tindahan tungod sa DNCSF.
“Pinaagi sa Coop Development Division – Davao del Norte Credit Security Fund adto nga time nag-invest ang former governor Rodolfo del Rosario 3 million sa DNCSF. Then ang mga member sa DNCSF maka-avail ug loan sa Land Bank, sa DBP without collateral ug baba kaayo ang interest. Proud pod ko nga i-announce sa inyo nga we are the only beneficiary sa project sa atoang Presidente Rodrigo Duterte under P3 program, ” matod sa KAMAVEMCO Manager Zenaida D. Bernardino nga mapasigarbohon sa tabang sa probinsyal nga panggamhanan nga nahimo silang benepisyaryo sa Pondo sa Pagbabago at Pag-asenso (P3) nasyonal nga programa.
Ang Frux Food Products sa Panabo City usa sab nga nakadawat ug dakong tabang sa DavNor bisan ang pag-promote sa mga produkto niini diha sa DavNor Pasalubong Center.
Si Engr. Humber Cabunoc ang division head sa Cooperative Investment Division samtang si Ms. Gloria Excelsa S. Pamugas mao sab ang division head sa EWDD.
Sa mensahe ni Gobernador Anthony del Rosario pinaagi ni Provincial Administrator Samson J. Sanchez, iyang gipasalig ang mapinadayonong suporta sa iyang administrasyon.
“Through our BEST PEOPLE development agenda, the province has since provided the mechanisms vital in generating more jobs, livelihood and income opportunities. . We cascaded the programs of the national government designed to expand opportunities for our people to earn decent living. Among them is the Trabaho, Negosyo, Kabuhayan (TNK) initiative of the Duterte administration. .aimed at helping the President attain his socio-economic agenda,” matod sa mensahe sa gobernador nga tungod sa maong paningkamot duolan sa 2,000 ang naka-avail sa livelihood and skills trainings, nakatabang nga makatrabaho ang 16,992 ka aplikante gawas pa sa mga negosyo.
Tungod niini nahimong nakab-ot sa DavNor ang 2017 Regional Best Performing Public Employment Service Office (PESO) Award ug Best Implementer in Special Program for Employment of Students Award.
