GISUGDAN na pag-konkreto ang 10.359 kilometros nga magdugtong sa Kimamon, Sto. Tomas hangtod Luna, Kapalong, Davao del Norte nga magkantidad ug P119,901.954.82.
Ang maong karsada gipondohan pinaagi sa 2017 Conditional Matching Grant Program (CMGP) aron tabangan ang 81 ka probinsya sa tibuok nasod aron makonkreto ug mamentinar ang mga provincial roads.
Gipangunahan ni Gobernador Anthony del Rosario (AGR) ang groundbreaking ceremony Martes, Abril 3, 2018 nga gitambongan ni Sto. Tomas Mayor Daniel Batosalem ug mga opisyales ingon man ang kontraktor nga GP & H Construction Inc.
“CMGP, Conditional Matching Grant Program sa panahon sa atong mahal nga Presidente Duterte is actually a continuation of the KALSADA program started by the former president. . In the previous administration of former Governor Rodolfo del Rosario, it was during that time together with the other governors in the Philippines thru the League of Provinces that came up with the concept of this KALSADA program. This was actually initiated by the governors. Dili ni programa nga gisugdan sa national government. . . Gi-kwento lang ni sa akoa of governor Chatto from Bohol who is the secretary-general nga it was Governor del Rosario who was instrumental in getting this program started,” matod ni Gobernador Anthony nga nagsugilon sa sinugdanan sa programa una pa kini nahimong CMGP.
Dugang gibutyag ni Gob AGR nga sa pagsugod sa KALSADA program (Konkreto at Ayos na Lansangan ang DAan tungod sa Pangkalahatang Kaunlaran) gigahinan kini ug P18 bilyones matag tuig nga gipaagi sa Department of Interior and Local Government (DILG) kinsa mao ang magtino kinsa nga mga probinsya ang kwalipikado sa maong pondo.
“Basically, it was to provide 18 billion pesos annually under the office of the DILG and it is the DILG who would determine kinsa nga mga provinces qualified nga makadawat ug pondo for the concreting of provincial roads,” padayong asoy sa gobernador kinsa naguol tungod kay alang sa tuig 2018 ang Davao del Norte gi-zero sa pondo gikan CMGP.
Ang Davao del Norte makadaghan na miani ug pasidungog labot sa implementasyon sa mga programa bahin sa karsada. Di pa lang dugay giila kini ingong “Galing Pook Awardee” tungod sa Community-Based Road Management facility nga programa apan nahimong napalaw sanglit gi-zero ang Davao del Norte sa tuig 2018.
Ang padayong Provincial Road Management Facility (PRMF) nga programa gikan sa nasod Australia dugang pamatuod sa maayong implementasyon sa Davao del Norte ug sanglit ang probinsya adunay halos 800 kilometros nga provincial road diin 10% lamang ang na-konkreto nagkinahanglan gayod kini ug tabang sa CMGP nga programa.
