NAPULO’G DUHA na ka tuig ang Panabo Mariculture Park ug padayong naghatag trabaho ug panginabuhian ilabina sa mga gagmay’ng mangingisda.
Gilusad niadtong Marso 30, 2006, ang PMP nasulod sa 617 ektaryas diha sa mga barangays San Pedro, Cagangohan ug J.P. Laurel nga naggahin ug 130 ektaryas alang sa giplanong 520 ka marine fish cages. Hangtod ning pagsulat 325 ka mga fish cages ang naghatag ug panginabuhian sa 224 ka pamilya nga mga mangingisda gawas pa sa mga tighimo ug fish cage, tigpadagko ug bangus fingerlings (Garungan), tig-harvest ug bisan ang mga Council of Women nga nakapahimulos ingong tig-proseso ngadto sa lain-laing produkto nga mahimo gikan sa bangus.
Si Lorna Sumiog ug iyang pamilya maoy usa sa 224 ka pamilya nga nahatagan ug trabaho tungod sa Panabo Mariculture.
“Kami ang nahimong beneficiary. Usa man kami ka mananagat sa Cagangohan. . . Pukot panglawod, mao na among pangisda,” saysay ni Mrs. Sumiog sa ilang pangisda sa una nga dunay mga higayon nga wala silay mabaligya kay gamay ra ang kuha nga isda.
Mapasalamaton nga usa sa nahatagan ug benepisyo sa programa sa gobyerno, matod ni Mrs. Sumiog nga dako na kaayo ang kalainan sa ilang kanhi nga panagat.
“Dako kaayo ug kalainan sukad na-beneficiary mi sa fisherfolk. . Depende sa pa-harvest naay mobarato ang kilo naa po’y mosaka. . pero sa una usahay di mi maka-timbang. Sa fish cage harbeson na siya mga upat o mag-lima ka bulan. Ang last namo nga harvest mi-limpyo mi ug P150,000 nakuhaan na na siya sa mga expenses. . fingerlings, feeds,” malipayong pagtug-an ni Lorna.
Sa bahin sa lokal nga gobyerno sa Panabo City, gipasalig ni Mayor James Gamao pinaagi sa iyang Executive Secretary ang 100% nga suporta.
“Ang atoang mayor 100% ang suporta sukad nilingkod siya. Bisan adtong vice mayor pa siya, maski adtong konsehal pa siya naa gyod ang iyahang suporta sa atoang mariculture industry . . kay mao ni ang paagi nga ma-uplift, mapataas nato ang panginabuhian sa atong mga fisherfolks. . . Busa priority ni mayor nga unsa man ang panginahanglan sa atong industriya 100% ang iyang suporta,” pasalig sa mayor nga gipaabot sa iyang Executive Secretary Engr. Judit Lee.
Gawas sa bangus, andam na sab ang pamunoan sa PMP nga idungan pagpadako ang isdang danggit diha sa mao ra nga fish cages ingong dugang kita dili lamang sa mga “locators” lakip na ang mga trabahante.
