SA TINGUHA nga matubag ang panginahanglan sa “fish sufficiency” sa probinsya, nagpahigayon ang probinsyal nga panggamhanan sa Davao del Norte pinaagi sa Provincial Agriculturist’s Office ug 2-ka adlaw orientation/training sa “Institutional Development with Emphasis on Good Aquaculture Practices” alang sa mga mangingisda sa probinsya Martes, Marso 20, 2018.
Gitutokan karon sa DavNor PAGRO ang pagbuhi ug pag-amoma sa isda ug gulay pinaagi sa “Aquaponics.”
“Mao ni ang unang training kay duna mi upat ka eskedyul sa Fishery Resource Management Division. . Kining aquaponics mao ni ang atong gi-introduce kay kabahin usab kini sa atong Caravan Festival of Services nga kadtong mga barangay diin gihimo ang caravan labi na sa Limbaan ug sa Dujali atong gi-invite ang mga kapitan para maka-observe unsa ang sistema, unsa ang pamaagi sa pagmugna aning proyekto nato nga aquaponics,” matod ni PAGRO Supervising Aquaculturist Alfredo Avenido, MFT.
Ang aquaponics maoy usa ka pamaagi sa pagbuhi sa gulay ug isda sa usa ka lugar o lokasyon diin ang hugaw sa isda mahimong magamit nga abono sa mga gulay. Unya ang tubig gikan sa gulay mobalik na usab didto sa binuhing isda.
Ang mga gulay nga pwedeng matanom o mabuhi niining sistemaha naglakip sa Chinese cabbage, Lettuce, Basil, Spinach, Chives, Herbs, Kamatis, Cucumber, Okra, Bell Peppers, Raddish ug bisan broccoli. Ang mga isda nga pwedeng buhion sabay sa mga gulayon naglakip sa Tilapia, Hito, Karpa, Koi, Goldfish, Silver Perch, Rainbow Trout, Seabass ug Paje o Ulang.
“Ug maaprobahan naa ta’y gi-propose budget para sa aquaponics. Duna pod ta’y Department of Agriculture nga model so kung moabot na to kada lungsod dire sa Davao del Norte matagaan na ug model sa aquaponics,” padayong pasabot sa Supervising Aquaculturist.
Kahinumduman nga sa paghatod sa probinsyal nga panggamhanan sa BEST PEOPLE Festival of Services didto sa Limbaan ug New Corella, dala niini ang paghatag ug mga fingerlings sa tilapia alang sa inland fishponds. Apan katuyoan sa administrasyon ni Gobernador Anthony del Rosario nga palapdan pa gyod kini pinaagi sa pagbuhi ug ubang klase sa isda sama sa hito sanglit mahal ang presyo niini.
Ang malamboon nga pagbuhi ug bangus pinaagi sa “mariculture cages” sa Panabo City ug IGACOS gipaayo pa sa probinsyal nga panggamhanan pinaagi sa paggamit sa lig-ong mga materyales nga maka-sustenir pananglit adunay bagyo o dagkong mga balod sa dagat.
Dili lang produksyon sa pangisda ang gihatag nga tabang sa DavNor lakip na niini ang ‘marketing’ aron sayon mabaligya ang abot sa mangingisda.
