NAGTINDOG, nagluhod ug ang uban nanglingkod samtang nag-fill-up sa application forms ang dul-an 400 ka estudyante gikan sa lain-laing eskwelahan sa Davao del Norte aron mopailawom sa eksaminasyon alang sa pagtrabaho sa Special Program for Employment of Students (SPES) didto sa Bulwagan ng Karunungan ug DavNor Training Center, Lunes, Marso 19, 2018.
Matod ni Ms. Jennalyn Mandino Salinda, Labor Employment Officer III sa Department of Labor and Employment (DOLE) nga duna na lamang 70 nabiling bakante alang sa 2018 nga summer program.
“There are only 70 slots left for the new for 2018. . So very stiff, then hopefully the SPES applicants undergoing exam will do their best,” matod sa DOLE Labor Employment Officer III.
Ang mga kwalipikasyon aron makatrabaho sa SPES naglakip ug passing grades ug pamatuod nga ang income sa mga ginikanan dili molapas ug P136,000 ang tuig. Uban ang birth certificate ingong pamatuod, kinahanglang sab nga ang SPES grantee mag-edad 15-30 anyos alang sa ikatulo nga kinahanglanon nga magtrabaho sulod sa 20 ka adlaw karong tingbakasyon sa eskwela.
Alang sa ilang sweldo, ang SPES grantee modawat ug P477 ang adlaw diin 60% niini bayaran sa probinsyal nga panggamhanan ug ang nabilin nga 40% abagahon sa DOLE.
“Sixty percent of their salary will be paid by the province and 40% will be paid by DOLE,” dugang pahayag ni Salinda.
Si Grezzel ug Larabelle nga pulos Grade 10 gikan sa Sto. Tomas Salvacion National High School desidido nga moapil sa paglaom nga madawat aron naay magasto bisan pa man kung gatosan ka mga estudyante sama kanila ang magtigi sa 70 lang ka bakanteng pwesto.
“Para naa mi magasto sa eskwelahan. . Laban lang, laban japon,” matod sa duha ka estudyante sa Sto. Tomas
Alang sab sa duha ka third year college gikan sa University of Mindanao Tagum nga si Karen Mae ug Rea gusto nilang dunay pang-tuition ug maka-ekperyensya sa panarbaho uban ang kumpyansa nga mopasar gyod sa eksam.
“Pang-tuition ug maka-experience . . kumpyansa nga mopasar,” masaligong pahayag sa duha ka taga UM nga estudyante.
Bisan si Beethoven Abapo gikan sa UM ug Grade 11, pinaagi sa SPES tumong sab nga makatabang sa mga ginikanan ug taas ang kumpyansa nga madawat.
“Kay para makatabang pod ko sa akong pamilya. . labi na ron summer way mabuhat walay eskwela maayo na lang makadungag sa ilang panginahanglan. . . Taas kaayo ang opensa,” masaligong pahayag sa third year college nga si Beethoven.
“I believed I have the capability to be one of the SPES. . confidence lang gyod. . . at least makatabang-tabang sa parents, experience pod,” matod sa determinadong Pedelyn Joy gikan sa ACLC nga eskwelahan.
Ang 20 ka adlaw nga pagtrabaho sa SPES magsugod Abril hangtod sa Mayo.
