DESIDIDO gayod ang probinsyal nga panggamhanan sa Davao del Norte nga patas-on ang produksyon sa humay aron matubag ang panginahanglan sa pangunang pagkaon sa tanang Dabaonon.

Ilawom sa BEST PEOPLE development agenda ni Gobernador Anthony del Rosario pinaagi sa Provincial Agriculturist’s Office (PAGRO), giawhag ang mga mag-uuma sa humay sa paggamit sa hybrid nga variety ug bisan sa pag-aplikar sa third cropping nga teknolohiya aron  mapataas gyod ang ani.

Ang Davao del Norte adunay sobra 18,000 ektaryas nga humayan apan 1,000 ektaryas lamang ang gi-deboto alang sa hybrid. Matod ni PAGRO department head Dr. Anastacia Notarte nga adunay dakong bentaha kung produksyon ang pagahisgotan sa hybrid itandi sa inbred.

“Base sa atoang potential yield, base sa characteristics sa hybrid rice, naa siya’y yield advantage nga 15-20% kay sa inbred. .dako nga advantage kung magtanom ta,” pahayag ni Dr. An Notarte ug nagklaro nga ang pag-atiman sa hybrid kun cultural management practices parehas ra sa inbred.

Bahin sa kalami sa inbred sama sa humok nga 160, matod ni Doc Ann nga duna sab klase sa hybrid nga makalabaw pa gani.

“Naa gihapon ta’y labi na tong hybrid nga 71H, comparable siya sa atong 160 sa kalami unya humot pa gyod,”

Hinuon giangkon sa hepe sa PAGRO nga ang dakong deperensya mao ang presyo sa binhi sa hybrid nga mahal kaayo diin mapalit kini P3,500 ngadto P5,000 ang matag bag depende sa variety.

Labot sa third cropping sa humay (katulo magtanom sa usa ka tuig) matod ni Dr. Notarte nga padayon ang ilang pag-testing human sa unang higayon nga gihimo didto sa New Visayas, Sto. Tomas diha sa 70 ektaryas. Sa sumada, sa aberids aduna lamang 3 MT (metriko tonelada matag ektarya) ang abot sa third cropping. Alang sa tuig 2018 adunay halos 400 ka ektaryas sa humayan gikan sa lima ka munisipyo sa probinsya ang andam na sab mosulay sa third cropping.

Sa pagka karon ang Davao del Norte aduna lamang rice sufficiency nga 86.6% ug ang kakulangan ginakuha gikan sa gawas sa Davao del Norte.

DavNor News