LIMBAAN, New Corella—Apil ang usa ka 78-anyos nga ginang ug ang iyang pares nga 74-anyos nga nagpakasal sa libreng Kasalan ng Bayan dala sa BEST PEOPLE Festival of Services nga gipahinabo sa Limbaan, New Corella, Davao del Norte, Huwebes, Pebrero 22.

Si Mrs. Clotilde Vargas, 78 anyos, 18 na ka tuig nga nakig-ipon kang Fermano Pilapil nga 74 anyos na sab.

“Nagminyo ko kay wa na man ko’y kauban. . Magpakasal aron masegurado nga bana ug asawa,” matod ni Clotilde.

Para kang Fermano, ang pagminyo maoy pagsunod sa angay ug gikinahanglan.

“Aron malimpyo nga way tulubagon sa ginoo,” matod ni Fermano.

Sa mensahe ni Gobernador Anthony del Rosario nga mao ang principal “ninong” uban ang mga department heads sa Kapitolyo ngadto sa 43 ka paresan nga nagpakasal, iyang gipasiugda ang mga benepisyo tungod sa legal nga kaminyoon.

“Sa tinuod lang importante gyod ni kay kitang tanan nakahibalo nga daghan man gyod mga benepisyo gikan sa gobyerno nga dapat nato madawat unya usahay dili madawat tungod lagi kay wa ta naka minyo ug legal. Apil dira of course kanang mga benepisyo sa Philhealth. Dili nimo maapil ang imong partner kung dili mo minyo unya ang mga anak pod ninyo tungod kay dili legal dili pod makadawat ug benepisyo. So usa ni sa solusyon para nga ang tanan nga benepisyo sa gobyerno moabot gyod sa inyohang pamilya,” matod ni Gobernador Anthony del Rosario ngadto sa mga gikasal nga kadaghanan dunay mga anak na.

Ang BEST PEOPLE Festival of Services maoy pagdala sa tanan regular nga mga serbisyo sa DavNor Kapitolyo uban sa pipila nasyonal nga mga ahensya sama sa Philippine Army, PNP, LTO, PAO, DSWD, DFA, PSA, DOH kauban ang munisipyo sa New Corella.

“Legal na mo ug madawat ninyo nga way problema ang tanan mga serbisyo sa gobyerno. Mao gyod na ang tuyo sa Kasalan ng Bayan nga atong gihimo dire sa BEST PEOPLE Festival of Services. . Basta kami naa lang mi dire kung naa probelam maminaw man mi maningkamot makatabang sa inyoha kay mao man gyod na ang role namo isip mga ninong ug ninang ninyo. . Ug ako nagalaom nga mag-improved samot ang inyohang relasyon sukad karong adlawa paingon sa kaugmaon,” panghinaut ni Gob AGR sa tanang gikasal.

Halos usa ka gatos ka matang sa serbisyo ang gidala sa caravan of services gawas sa normal nga serbisyo sa mga departamento sa DavNor Kapitolyo lakip na niini ang libreng gupit, renewal sa Professional License, Driver’s License, Pasaporte, Handog Titulo sa Yuta.

Ang unang hugna sa BEST PEOPLE Festival of Services para sa barangays Limbaan, Cabidianan, Macgum, Sto. Niño ug Suawon gidugok bisan gikan sa ubang barangay sa New Corella. Ang sunod nga adtoan sa BEST PEOPLE mao na ang Braulio E. Dujali karong Marso 2-7, 2018.

DavNor News